Абый улууһун Уолбут нэһилиэгэр быйыл оскуоланы соҕотох үөрэнээччи бүтэрэр -- Нил-Виктор Дохунаев.
Кинини олох киэҥ аартыгар бүтүн оскуоланан атаардылар. Нил-Виктор маннык улахан болҕомтону ылыан ылар. Тоҕо диэтэххэ, соҕотоҕун оскуолатын аатын элбэхтэ олимпиадаларга, кэмпириэнсийэлэргэ, күрэхтэһиилэргэ көмүскээн, кыайыылаах аатын ылаттаабыта.
Дэгиттэр талааннаах Нил-Виктор Тиһэх чуораан күн бэйэтин бирииһигэр эстафета тэрийэн, үөрэнээччилэр үөрүүлэрин үксэттэ.
Уолбут оскуолатын соҕотох выпускнига Нил-Виктор Дохунаевка ситиһиилэри баҕарыаҕыҥ. Бу курдук туохтан да толлубакка, санаатын түһэрбэккэ, иннин диэки эрдээхтик эрдэн истин, дьоллоох-соргулаах киһи буоллун!
Манна даҕатан эттэххэ, ыам ыйын 21 күнүгэр Абый улууһун 7 оскуолатыгар 586 үөрэнээччигэ бүтэһик чуораан чугдаарда. Итинтэн 39 үөрэнээччитэ тохсус кылааһы, 33 үөрэнээччитэ уон биириһи бүтэрдилэр. Туйгун үөрэхтээх сэттэ оҕо, ЕГЭ-лэрин үрдүк баалга туттардахтарына, кыһыл көмүс мэтээллээх түмүктүөхтэрэ.
Хотугу кыраай оҕолоро, кытаатыҥ, улуускутугар туһалаах дьон буола үүнүҥ!
-
10
-
5
-
0
-
0
-
0
-
0
