Олох олоруон баҕалаах, көхтөөх-тэрээһиннээх киһи манна сүрэҕэ-дууһата тугу этэринэн түөс толору тыынан олоруон сөп. Биир оннук дьиэ кэргэн, аймах билэ дьон махталларын тиэрдэр үтүөкэн түгэн тосхойбутун мүччү туппакка суруйан эрэбин.
«Олохтоох дьаһалта дьон баҕа санаатын өйүүр-өйдүүр уонна кыах баарынан көмөлөһөр эбит. Саныахха үчүгэйэ бөҕө. Чуолаан, туһулаан, Семен Игнатьевка махталбын тиэрдиэм этэ» диэн Людмила Николаевна Жиркова суруйар.
Людмила Николаевна, Владимир Владимирович Христофоровтар дьиэ-кэргэн 5-6 сыллааҕыта алын сүһүөх кылааска үөрэнэр хаан уруу бырааттарын иитэргэ-үөрэтэргэ эппитинэс ылан, Хатас орто оскуолатыгар киллэрбиттэрэ. Уолаттар Дьылҕа Хаан кытаанах ыйааҕынан итиччэ кыра саастарыгар төгүрүк тулаайах хаалбыттар. Күн бүгүн Семен, Спартак Николаевтар Хатаспыт аатын араас элбэх үрдүк таһымнаах күрэхтэргэ, көрүүлэргэ ааттаталлар.
Семен кылааһын салайааччыта Никифоров Петр Андреевич, Спартак кылааһын салайааччыта Оконешников Егор Алексеевич биирдии оҕоҕо тус хайысхалаах үлэлэрин биир үтүө түмүгэ бу оҕолорго көстөр. Ол курдук, Семен Николай Михайлович Андросовка дьарыктанан, музыка эйгэтигэр, тыыннаах дорҕоон добун дойдутугар кыра эрдэҕиттэн сылдьан, бэрт элбэх кэнсэирдэргэ, көрүүлэргэ кытынна.
Спартак тустууга кэккэ ситиһиилэрдээх, тренерэ А.Осипов эрэлэ улахан. Уолаттар кэлээт даҕаны, С.Контоевка дьарыктаммыттар. “Степан Степанович билигин даҕаны сибээһин быспат, кыах баарынан көмөлөһөр”, -- диэн сэһэргиир Людмила.
Уолаттар кылаастарын кытта айылҕаҕа элбэхтэ сырыттылар, саха киһитин төрүт дьарыгар уһуйулуннулар – айылҕаҕа харыстабыллаах сыһыаҥҥа, сатабыллаах буоларга, дьону-сэргэни кытта алтыһарга, о.д.а. Ол курдук, муҥхалыыллар, тыа кыылларыгар эбиилик аһылык аһыыр сирдэрин оҥорсубуттара, сайын айылҕаҕа лааҕырга олороллор. Онно уу баһан, уот оттон, ас астанан, сүүрэн-көтөн о.д.а. Бу туһунан суруйбутум «Хатастардыын алтыһыахха» кинигэҕэ киирбитэ.
Уолаттар билигин бииргэ төрөөбүт эдьиийдэрэ Саргылаана дьиэ кэргэнигэр олорон үөрэнэллэр, сайдаллар-үүнэллэр. Биллэн туран, Людмилалаах Владимиры кытта сибээстэрин быспаттар, кэлэллэ-бараллар, ылсаллар-бэрсэллэр. Манна даҕатан эттэххэ Владимир Владимирович Дьокуускай куорат аҕаларын сүбэтин актыыбыгар баар.
Руфова Н.Хатас.ыам ыйа 2022
-
12
-
0
-
0
-
0
-
0
-
0
