– Күндү биир дойдулаахтарым, ыраахтан-чугастан кэлбит ыалдьыттар! Ханнык баҕарар норуот, хайа баҕарар омук, улаханыттан кыратыттан тутулуга суох, тус историятыгар хайдах сыһыаннаһарын бэйэтэ эрэ быһаарар. Таһыттан кинилэри ким даҕаны улаханнык дьарыйбат, көҕүлээбэт даҕаны, улаханнык билиҥҥи кэмҥэ күөмчүлээбэт даҕаны.
Онон саха норуота, саха омуга бэйэтин ааспыт кэмин, бэйэтин өбүгэлэрин олохторун үөрэтэн, кэнэҕэски ыччакка хайдах оҥорон, хайдах быһыылаан-таһаалаан тириэрдэрэ – бу билиҥҥи күҥҥэ бэйэтин соруга. Биһиги саха норуотун историятыгар атын улуустар дьонун-сэргэтин кытта, атын саха дьонун-сэргэтин кытта тэҥҥэ тутан, бу бороҕоттор, дүпсүннэр, байаҕантайдар, уус алданнар бэйэбит утары анньар, тэҥҥэ тутар дьонноохпут. Ол дьоммут аатын-суолун үйэтитэр уонна бүтүн саха норуотун таһымыгар тутан илдьэ сылдьар бу биһиги, олохтоох дьон, эмиэ соруктаахпыт.
Бүгүн бэйэбит өбүгэлэрбитигэр – Лөгөй Тойоҥҥо, Майаҕатта Бэрт Хараҕа – билиҥҥитэ сүрдээх үчүгэй оҥоһуулаах пааматынньыктар турдулар, мэҥэ таастар.
Иннибитигэр – Күлүмнүүр аатынан дыбарыас, уҥа өттүбүтүгэр – Сэһэн Ардьакыап түмэл дьиэтэ. Бартыһаан Дьөгүөрэптээхпит. Биһиги дьоруойдарбыт бука бары бу улуус киинигэр манна киһилии үчүгэйдик оҥоһуллан тураллара дьону-сэргэни үөрдэр эрэ буолбатах, кинилэр өйдөрүн-санааларын сытыылыыр уонна урукку өттүгэр бэйэбит историябытыгар махталлаах, ытыктабыллаах буоларга ыччаппытын иитэр-үөрэтэр соруктаахтар.
Инникитин даҕаны саха норуота чэчирии, силигилии сайда турдун! Өрөспүүбүлүкэбит инникитин күүһүрэн, кыаҕыран истин! Бука бары баар уонна бииргэ буолуоххайыҥ!
Бэҕэһээ Мүрү эбэтэ спартакиада саҕаланыан иннинэ сирин-уотун ыраастанна, элбэх киһи мустуон иннинэ. 2009 сыллаахха Олоҥхо Ыһыаҕа буолуон биир күн иннинэ эбэ бэйэтин эмиэ ыраастаммыта. Онтон ылата сарсыҥҥы күнтэн саҕалаан чэмэлгэн күннэр турбуттара. Олоҥхо Ыһыаҕа сүрдээх үчүгэйдик ыытыллыбыта. Саха сирин норуоттарын VIII спортивнай оонньуулара эмиэ оннук буолуоҕа. Эбэ бэйэтин ыраастанна, бүгүҥҥү күнтэн ыла чэмэлкэй, үчүгэй күннэр туруохтара, спартакиада үрдүк таһымнаахтык барыаҕа, дьон-сэргэ, ыалдьыттар бу спартакиада туһунан уһун сылларга үтүө кэпсээн оҥосто сылдьыахтара!
Источник: www.iltumen.ru
-
0
-
0
-
0
-
0
-
0
-
0
