«Сиинэ» туристическай база дириэктэрэ Айсен Гоголев үлэтин туһунан кэпсээтэ.
-Биисинэскин туохтан саҕалаабыккыный?
- Биисинэһи социальнай хантараактан саҕалаабытым.
- Дьон төһө сылдьарый?
- Туристар сайын ордук сылдьаллар, ол эрэн 2018 сылтан кыһыҥҥы тууру ыйыталлара элбээтэ (кыһыҥҥы ойуур, булт-алт, балык).
- Ордук эдэрдэр сылдьаллар дуу, аҕа саастаах көлүөнэ дуу?
- Биһиги туриспыт сааһа: 35-70, атаҕар турбут, сиппит-хоппут, дьиҥ айылҕаны кытта алтыһыыны баҕарар туристар.
- Пандемия уонна былырыыҥҥы баһаардар туризм үлэтигэр төһө дьайдылар?
- Эдэр тэрилтэҕэ баһаар уонна дьаҥ улахан хоромньу оҥордулар, син биир кредитнэй эбэһээтэлистибэ диэн баара, дохуот икки сайын суох этэ.
- Судаарыстыбаттан туох эмэ көмөнү (холобура, грант) туһаммыккыт дуо?
- Судаарыстыбаттан маҥнай тэринэрбэр социальнай хантараак баттаспытым уонна Уһук Илин гектара бырагыраама сир ыларга туһалаабыта, грантовай куонкуруска сыл аайы кыттабын даҕаны кыайбаппын.
- Саха Сиригэр туризм билигин төһө сайдар кыахтааҕый?
- Саха Сирин туризма билигин сайдар кыаҕа суох, өй-санаа ситиэн наада, дойду сокуона уларыйыан наада, хааччах элбэх. Хас биирдии ыал туризм эйгэтиттэн харчыланара ыраах, туризм эйгэтин култуурата үөскүү илик. Саха Сиригэр туризм эйгэтэ "оҕо сааһын ааһа сылдьар", биһиги курдук энтузиастар иитэн бүөбэйдии сылдьабыт.
- Сынньалаҥ усулуобуйатын тупсарыыга туох үлэ барарый?
- Хас сыл аайы база ис-тас көстүүтүн тупсарыы, базаҕа ыалдьыт сынньанар усулуобуйатын, илдьэр-аҕалар тиэхиньикэни, ас-үөл боппуруоһун сайыннарыы, тупсарыы барар.
- «Сиинэ» турбазаҕа киһи туох өҥөнү туһаныан сөбүй?
- «Сиинэ» турбазаҕа ыалдьыт турмашрута бырагырааматын ис хоһооно уопсай сүбэнэн туристыын оноһуллар, айылҕаҕа сынньаныы чэрчитинэн килийиэн тугу баҕарарын учуоттаан туран (сокуоҥҥа сөп түбэһэн) толору бүөбэйдээн, аһатан, арыаллаан илдьэ сылдьан (балыктааһын, сир аһа хомуйуу, булт, үрэххэ сынньаныы, хайаны дабайыы, тыа дьоно күннээҕи олоҕун көрдөрүү - агротуризм) сыл устата үлэлиибит.
-
2
-
0
-
0
-
0
-
0
-
0
