Издательский дом Редакция Подписка
Погода в Якутске: . -14 oC

“1907 сыл балаҕан ыйын 25 күнүгэр Бөрө Бастаах алааска уол оҕо саҥата эйээрбитэ”, -- диэн учууталларбыттан Раиса Реасовна Кулаковскаяттан, Татьяна Афанасьевна Гоголеваттан аан бастаан истибиттээхпин. Ити Суотту орто оскуолатын үөрэнээччитэ эрдэхпинэ, арааһа, ааспыт үйэ 80-с сылларын саҥаларыгар этэ.

“1907 сыл балаҕан ыйын 25 күнүгэр Бөрө Бастаах алааска уол оҕо саҥата эйээрбитэ”, -- диэн учууталларбыттан Раиса Реасовна Кулаковскаяттан, Татьяна Афанасьевна Гоголеваттан аан бастаан истибиттээхпин. Ити Суотту орто оскуолатын үөрэнээччитэ эрдэхпинэ, арааһа, ааспыт үйэ 80-с сылларын саҥаларыгар этэ.

 Онтон ыла сүгүрүйэр сүдү киһилэммитим. Кини -- киһи киэнэ кэрэтэ, аҕыс кырыылааҕа, саха биллиилээх поэта, публицист, очеркист, элбэх олоҥхо ааптара, бөдөҥ судаарыстыбаннай уонна уопсастыбаннай диэйэтэл, П.А. Ойуунускай аатынан Судаарыстыбаннай бириэмийэ лауреата Сергей Степанович Васильев-Борогонскай!

Vasiliev Sergey Stepanovich

 Хас даҕаны сыллаах дьаныардаах үлэбит түмүгэр, биһиги, Суотту оҕолоро, киэн туттар биир дойдулаахпыт олоҕун, айар үлэтин учууталларбыт Р.Р.Кулаковская, Т.А.Гоголева салайыыларынан үөрэтэн, киэҥ эйгэҕэ таһаарсар дьон буола улааппыппыт.

Патриоттуу санаалаах буола иитиллэн тахсыыбытыгар оскуолабыт кэлэктиибэ далааһыннаах үлэни ыыппыта. Оччотооҕу салайааччыларбыт Михаил Николаевич Абрамов, Людмила Семёновна Тарская этилэр.

Бастакы "Васильевскай ааҕыылар" ураты күүстээх сыаллаах-соруктаах улахан тэрээһин 1986 сыллаахха ыытыллыбыта. Маныаха хас биирдии оҕо, учуутал, төрөппүт, уопсастыбаннас барыта хамсаабыта. Бу ааҕыыларга мин бииргэ үөрэнэр доҕотторум Зина Сивцевалыын, Сережа Абрамовтыын, Костя Окоемовтыын, Туяра Кривошапкиналыын, Ганя Портнягинныын кыттан турабыт. 1986 сыллаахха бу ааҕыы лауреата ааты ылбытым.

 Ытык киһим, учууталым Раиса Реасовна олохпор элбэх умнуллубат түгэннэри бэлэхтээбитэ: ол курдук саха суруйааччылара Суорун Омоллооннуун, Леонид Поповтуун, Николай Габышевтыын, Реас Кулаковскайдыын, биллиилээх учуонайдар Георгий Башаринныын, Сардаана Ойуунускайалыын, араадьыйа суруналыыһа Степан Дадаскиновтыын уо.д.а. уһулуччулаах дьоннуун биир салгынынан тыыннаран, тылларын-өстөрүн илэ иһитиннэрэн, биһиэхэ ураты эйгэни оҥорбутунан дьоллоохпут.

index 10

 Дьоллоохпут букатын оҕотук сааспытыттан С.Васильев айымньыларын режиссер Татьяна Афанасьевна Гоголева үөрэтиитинэн сатаан дьоҥҥо  тиэрдэр аналлаахпытынан. 1987 сыллаахха оскуолабын бүтэрэрбэр, С.С.Васильев аатынан бириэмийэнэн бэлиэтэммитим. Мин иннибинэ бу бириэмийэнэн Стеша Аржакова, Ира Ядрихинская, Станислав Попов, Володя Заровняев наҕараадаламмыттара.  Кэлин үөрэммит оскуолабар үлэлиир кэммэр бу бириэмийэнэн бэлиэтэммит үөрэнээччилэрбинэн Илья Степановынан, Саргы Пермякованан, Инна Бочкареванан, Варя Портнягинанан киэн туттабын.

"Кэриэстиир эн ааккын төрөөбүт норуотуҥ..."
С.С. Васильев-Борогонскай төрөөбүтэ 115 сылыгар аналлаах Дьокуускай куоракка ыытыллар тэрээһиннэр
ПРОГРАММАЛАРА:
Буолар кэмэ: 2022 с. балаҕан ыйын 25 күнэ.
Буолар сирэ: Чиряева, 4 уонна Ильменскэй уулуссалар

11. 00 ч. С.С. Васильев - Борогонскай олорон ааспыт дьиэтигэр мемориальнай доска туруоруу сиэрэ-туома;

12. 00 ч. Ильменскэй уулуссаҕа "Ильмень үрдүнэн туруйалар" мемориал-сквергэ С.С. Васильев-Борогонскай "Улуу Ильмень" балладата суруллубута 55 сылыгар аналлаах миитин.

Саха тэлэбиидэнньэтин ханаалыгар балаҕан ыйын 24 күнүгэр  "Кэрэ кэпсээҥҥэ" көстүбүт биэрии  28.09. кунус 15ч 00 м. хатыланар.

Учуутал ытык суола салҕанар эбээт -- эрэллээх үөрэнээччилэринэн. Күндү биир дойдулаахтарбар Алгыс кэриэтэ аныыбын - С.С.Васильев-Борогонскай тылларын: “Киһи аҕыс кырыылаах буолуохтаах, кылыстыы кылбаҥныы оонньуохтаах, кустук өҥүн дьэрэкээнин ылыахтаах, үйэлэри үрдүнэн хардыылаан иһиэхтээх, Киһи өҥнөөх буолуохтаах!!!”

 Саргылаана Лебедева,

СӨ үөрэҕириитин туйгуна,

Дьокуускай к.

  • 3
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением