Маҥнайгы боппуруоһунан анал байыаннай дьайыы кыттыылаахтарын олорор дьиэлэрин автономнай гааһынан хааччыйыы боппуруоһа турда. Иһитиннэриини Ил Түмэн тутууга, олох-дьаһах хомунаалынай хаһаайыстыбатыгар уонна энергетикаҕа сис кэмитиэтин бэрэссэдээтэлэ Александр Корякин оҥордо.
Кини иһитиннэрбитинэн, 2023 сыл устата ОДьКХ ГУП аадырыһыгар анал байыаннай дьайыы кыттыылаахтарын олорор дьиэлэрин киин ититэр ситимҥэ холбооһуҥҥа 145 сайаапка киирбит. Олортон 80 кэтэх дьиэ киин ититиигэ холбонуо, 10 дьиэ кэтэх тэрилтэлэр нөҥүө боппуруостара быһаарыллыа, 3 дьиэ киин гаас ситимигэр холбонуо.
Маны этэн, туран хаалбыт 52 кэтэх дьиэҕэ гаас автономнай систиэмэтин туруорарга этии киллэрдэ. Маннык систиэмэҕэ гаас газгольдер диэн анал резервуарга харайыллар, салгыы турбанан дьиэҕэ киирэн туһаныллар. Быһа холоон 52 дьиэни автономнай гаас ситимигэр холбуурга 34 мөл.солк. ирдэнэр.
Сис кэмитиэт чилиэннэрэ этиини өйөөтүлэр, уонна судаарыстыбаннай бүддьүөтү ылыныы боппуруоһугар үбүлээһин көрүллүүтүн киллэрэргэ сөбүлэстилэр.
Маны тэҥэ норуот дьокутааттара Москуба куоракка баар “Бэс Чагда” санаторийга байыаннай эпэрээссийэ кыттыылаахтарын, дьиэ кэргэннэрин чилиэннэрин чэбдигириитин, оһолломмуттарга үрдүк технологиялаах протезтааһыны оҥорууну ырыттылар.
Мунньах туһунан сиһилии “Ил Түмэн” хаһыат аныгыскы нүөмэригэр билсиҥ.
-
0
-
0
-
0
-
0
-
0
-
0
