Бэстибээл 10 сыл устата тохтуу сылдьан баран ыытыллыбыта көрөөччүлэргэ кэтэһиилээх бэлэх буолла. Үс күннээх бэстибээл джазовай ускуустуба чулуу муусукааннарын уонна тыыннаах муусуканы сөбүлээччилэри түмтэ. Кыттааччылар, ыалдьыттар Турцияттан, Арменияттан, Владивостоктан, Москубаттан, Санкт-Петербуртан кэллилэр. Онон, кырдьык даҕаны, норуоттар икки ардыларынааҕы бэстибээлгэ кубулуйда.
Гала-кэнсиэр кэмигэр Ил Түмэн култуураҕа уонна сонуну киэҥник тарҕатар ситимнэргэ сис кэмитиэтин бэрэссэдээтэлэ Виктор Губарев үс күннээх джаз бырааһынньыгын бэлэхтээбит мусукааннарга, тэрийээччилэргэ махталын биллэрдэ.
«Бу дьиҥ чахчы норуоттар икки ардыларынааҕы бэстибээл буолла. Тэрээһин биһиги сылаас тыыннаах, нус бараан өрөспүүбүлүкэбитигэр ыытыллыбытынан эҕэрдэлиибин. Бэстибээл манна ыытыллыбыта - биһиги ыалдьытымсах норуот буоларбыт, сатабылбытын, билиибитин киэҥ араҥаҕа билиһиннэрэрбит, үөрэнэргэ баҕалаахпыт туоһута. Бу күннэр джаз муусукатын билээччилэргэ, сэҥээрээччилэргэ, таптааччыларга хатыламмат дуоһуйууну аҕалла. Үөскээбит доҕордоһуу ситимэ күүһүрэ турдун, муусуканан эйэ, дьоллоох олох түстэннин!», - диэн эттэ.
Бэстибээл сүрүн көҕүлээччитэ уонна тэрийээччитэ, цииркэ дириэктэрэ Сергей Расторгуев бэстибээл тэриллибит устуоруйатын туһунан кэпсээтэ. Цииркэ 1994 сылга тэриллэн, бас билэр дьиэлэниэҕиттэн, бэйэтэ балеттаах, оркестрдаах буолуохтаах диэн соругу толорбуттар. Оркестр тэриллэн, Айаал Малышев салайбыт, онтон салайааччынан Андриан Егоров буолбут. 2004 сыллаахха саҥа дьиэ тутуллан киирбитигэр, бэстибээллэри тэрийэр буолбуттар. 2006 сыллаахха бастакы «ТОҤ-ДЖАЗ» бэстибээл тэриллибит.
Гала-кэнсиэр үрдүк таһымҥа ааста. Кэнсиэр бырагырааматыгар классическай джаз, аныгы толорооччулар айымньылара, аранжировкалара иһилиннилэр. Тэрийээччи, цииркэ оркестрын салайааччыта, Sakha Big Band джазовай оркестры уонна Session Club джаз-бэнды салайар Егор Ефимов ыраах сирдэртэн ыҥыртаабыт артыыстара сыананы киэргэттилэр. Кини Тываҕа, Москубаҕа, Владивостокка, атын да куораттарга билсибит муусукааннарын ыҥыртаабыт. Холобур, Алексей Черемизов — Арассыыйа бастыҥ джазовай пианиһа. Урут биһиги бэстибээлбитигэр кыттыбыт.
Турцияттан джаз ырыаһыт Сибель Көсе кэлбит. Владивостоктан Vladovski Electric Band группа кытынна. «Айархаан» бөлөх солисткалара Sakha Big Band састаабыгар джаз увертюраларын толордулар. Валентина Романова-Чыскыырай, Арассыыйа таһымыгар биллибит, билигин Ереваҥҥа олорор биир дойдулаахпыт Июлина, Москуба куораттан биллиилээх джаз ырыаһыт Вячеслав Явкин сэргэх джаз ырыаларын иһитиннэрдилэр. Егор Ефимов тапталлаах кэргэнэ, ырыаһыт Юлия Кан куолаһа цииркэ куполун анныгар күүстээхтик дьиэрэйдэ. Манна даҕатан эттэххэ, бэстибээл чэрчитинэн маастар-кылаастар, айар көрсүһүүлэр, кэнсиэртэрбуоллулар. Тэрийээччилэр этэллэринэн, инникитин джазбэстибээлэ аны сылын ахсын ыытыллар буолуоҕа.
Автор хаартыскаҕа түһэриилэрэ.
-
0
-
0
-
0
-
0
-
0
-
0
