Уопсастыба

Бырааһынньык киэһэ биир бэлиэ түгэнинэн “Уһук Илиҥҥи джаз түмсүүтүн” холбоһуктаах оонньооһуна буолла. Хабаровскайтан, Владивостоктан, Санкт Петербургтан уонна Дьокуускайтан бастыҥ джазменнар араас импровизациялары иһитиннэрдилэр. Бырагыраама быһыытынан Леонид Анциферов, Оксана Чупикова, Алексей Солдатов, Юлия Кан, Егор Ефимов, цииркэ оркестырын иһинэн үлэлиир jazz-band «Session Club», «ORDO» этно-группа, «Самое Время» группа ыллаатылар, умнуллубат композициялары бэлэхтээтилэр.

Салгыы аныгы джаз айымньыларын, ааптарскай композицияларын, аранжировкалары иһитиннэрдилэр. Романтическай джаз классикатын, бар дьон сөбүлүүр дойдубут бастыҥ айымньыларын, Сахабыт Сирин ыстандаартарын иһитиннэрдилэр. Тыыннаах муусука доҕуһуоллаах кэрэ, туспа айылгылаах киэһэ ааста. Бэстибээлгэ латино, классика, бэл, былыргы саха ырыата уонна буруолуу сылдьар сабыс-саҥа ырыа иһилиннэ. Бырагырааманы Алексей Егоров-Өркөнү кытары толкуйдаабыттар.

Кэнсиэр буолар күнүн иннинэ, олунньу 13 күнүгэр үгэс быһыытынан суруналыыстарга анаан пресс-кэмпириэнсийэ тэрилиннэ. Тэрийээччилэр уонна кыттааччылар аныгы култуураҕа джаз оруолун, инники былааннарын сырдаттылар.

Бырайыак салайааччыта, Судаарстыбаннай цииркэ оркестрын салайааччыта Егор Ефимов суруналыыстарга: “Тоҥ-джаз” – аатырбыт бэстибээл. Быйыл сэттис төгүлүн Дьокуускай куоракка ыытыллар. Быйылгы бэстибээл уратыта диэн, манна Уһук Илиҥҥи джаз түмсүүтэ кытынна, ол иһигэр Хабаровскайтан Антон Березняк, Владивостоктан Иван Самарин уонна Санкт Петербургтан Алексей Колобов кэллилэр”, - диэн кылгастык билиһиннэрдэ.

Бэстибээл чэрчитинэн улахан гала-кэнсиэр, муусукаҕа маастар-кылаас, ритм-секция уонна джем-сейшн буоллулар.

“Муусукааннар дьиэлэригэр” саҕалааччыларга уонна уопуттаах муусукааннарга анаан маастар кылаас ыытылынна, сатабылга саҥа ньымалары көрдөрдүлэр.

Егор Ефимов эппитинэн, биһиги эрэгийиэммитигэр джаз сайдыыта экспортка кыаҕы арыйар, Арассыыйа, тас дойду сыаналарыгар суолу тэлэр. Ол курдук, 2024 сыллаахха ыытыллыбыт алтыс бэстибээлгэ Арассыыйа муусукааннарын сэргэ Армения, Турция ырыаһыттара кыттыыны ылбыттар. “Ол сыл Санкт Петербурга “ЭтоЭтно” этническай муусука VI бэстибээлигэр Валентина Романова - Чыскыырайы кытары “Саха-Джаз” муусука бырайыагын билиһиннэрбиппит. Бу олус сэргэх тэрээһин Петропавловскай кириэппэс таһыгар ыытыллыбыта. Манна аныгы джаз уонна рок-матыыптары дьүөрэлээн сахалыы джаз матыыптарын толорбуппут. Үгэс буолбут үнүстүрүмүөннэри сэргэ хомус абылаҥнаах матыыптарын, чыычаах саҥатын, айылҕа тыаһын силбэһиннэрэ туппуппут. Бу айымньыларбытынан элбэх гастролларга сылдьыбыппыт, норуоттар икки ардыларынааҕы араас бэстибээллэргэ кыттыбыппыт”, - диэн кэпсээтэ.

Оттон бэстибээл аатын суолтатын туһунан суруналыыстар туоһуласпыттарын, “тоҥ” диэн тыл биһиги Сахабыт Сирин уратытытын, тымныытын, дьыбарын аатынан билиһиннэрэр. Маны сэргэ, нууччалыы “н” буукубанан сурулуннаҕына, “тон” диэн муусука биир тиэрминин аатыгар дьүөрэлэһэр. Маны сэргэ, цииркэ дириэктэрэ Сергей Расторгуев бэлиэтииринэн, саха үнүстүрүөмүнүн – күпсүүрү оҕустахха иһиллиитэ “тоҥ” диэн буолар. Бу барыта холбоһон, силбэһэн кэлбит ыалдьыттарга бэстибээл төрдүн төбөтүн, Сахабыт Сирин уратытын көрдөрөр, билиһиннэрэр.

Пресс-кэмпириэнсийэҕэ ыалдьыттарбыт Антон Березняк, Иван Самарин бэйэлэрин санааларын үллэһиннилэр. Ол курдук, Антон Дьокуускайга хаһыс да сырыыта буоларын эттэ. Сахабыт Сирин муусукааннара олус талааннаахтарын, саҥаны билэ-көрө сатыылларын, айымньыларыгар уратылары киллэрэллэрин, сэргэхтэрин эттэ. Оттон Иван Дьокуускайга маҥнайгы сырыыта. Сахабыт Сирэ тымныы эрээри, олус элэккэй дьоннооҕун-сэргэлээҕин бэлиэтээтэ, инникитин даҕаны ыҥырыы туттаҕына кэлэр баҕа санаалааҕын эттэ.

Түмүккэ бэлиэтээтэххэ, Сахабыт Сиригэр джаз сайдыыта бу салааҕа ураты бэриниилээх энтузиаст джазменнарга олоҕурар. Дьокуускай куоракка “Осенний джаз” бэстибээли сөргүтэллэригэр баҕа санаалаахтар.

Галина МАТВЕЕВА

Ааптар хаартыскаҕа түһэриилэрэ