Бүгүн, кулун тутар 14 күнүгэр, Саха Тыйаатырыгар пуорум пленарнай мунньаҕа буолла. Мунньаҕы бырабыыталыстыба бэрэссэдээтэлэ Кирилл Бычков арыйда. Кини актыбыыстары икки күннээх таһаарыылаах үлэни ыыппыттарынан эҕэрдэлээн туран, Бэрэсидьиэн граннарын Пуондатынан үлэ барыытын иһитиннэрдэ.
Кини бэлиэтээбитинэн, Саха Сирэ Уһук Илиҥҥи федеральнай уокурукка Бэрэсидьиэн граннарын Пуондатыгар сайаапкалары суруйууга, үбүлээһиҥҥэ, кыайыыга инники күөҥҥэ сылдьар.
“Бу биһиги уопсай үлэбитин билинии эрэ буолбакка, дойдубут бэрэсидьиэнин, судаарыстыба өттүттэн кэммиэрчэскэйэ суох секторга өйөбүл уонна убаастабыл баарын бэлиэтэ», – диэн эттэ.
Ил Дархан Айсен Николаев өйөбүлүнэн, бэрэсидьиэн граннарын Пуондатын бырайыактарыгар эбии үбүлээһин (софинансирование) сыллата улаатар, социальнай бигэ туруктаах буолууга көмө оҥоһуллар. Ол курдук, быйыл Бэрэсидьиэн граннарын Пуондатыгар көрүллүбүт эбии үбүлээһин 103 мөл.солк. куоһарбыт.
Ааспыт түөрт сыл устата СӨ Ил Дарханын граннарын куонкуруһугар 1517 сайаапка киирбит. Олортон 292 бырайыак өйөнөн, 372,7 мөл. солк. үбүлэммит.
Кини эппитинэн, гражданскай уопсастыба инники кэскилбитин тутууга сүҥкэн улахан оруоллаах, туохха да тэҥнэспэт көмөлөөх.
Саха Сирин үрдүнэн тыһыынчаттан тахса социальнай хайысхалаах кэммиэрчэскэйэ суох тэрилтэ уонна түөлбэ баар. Манна дойдуларын туһугар сүрэхтэринэн ыалдьар, биир санаанан салайтарар актыыбыстар түмсэллэр. Быйыл ыытыллыбыт Гражданскай пуорумҥа Саха Сирин араас муннугуттан 500-тэн тахса дэлэгээт кыттынна.
Хаартыска: Якутия 24 уонна Андрей Сорокин, ЯСИА.
-
0
-
0
-
0
-
0
-
0
-
0
