Мунньаҕы норуот дьокутаата, “Саха Сирин Аартыката” түмсүү бэрэсидьиэнэ, Ил Түмэн төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева салайда. Кини бу үөрүүлээх күн Владимир Членов сырдык аатын үйэтитэр сыалтан кини аатынан олохтоммут бириэмийэ туттарылларын санатта. Бириэмийэ хас да номинациялаах, Аартыка уонна Хоту улуустар экэниэмикэлэрин уонна социальнай олох эйгэтин бастыҥ үлэһиттэригэр бэриллэр.
“Хоту уонна Аартыка бастыҥ табаһыта” ааты Өлөөн улууһуттан Василий Иванович уонна Валентина Васильевна Степановтарга туттардылар. (Спонсор “Аартыкатааҕы атыы-эргиэн хампаанньата”, генеральнай дириэктэр Сайдам Федотович Степанов).
Номинация кыайыылааҕа Василий Иванович билигин 80 сааһа, 60 сыл устата таба иититинэн дарыктаммыт. Кини кочевой оскуолалары төрүттээһиҥҥэ, үлэлэтиигэ ураты оруоллаҕын Елена Христофоровна бэлиэтээн эттэ.
“Массыына тырааныспарын бастыҥ үлэһитэ” ааты “Аллайыаха” суол учаастагын машиниһа Михаил Михайлович Кузин тутта (спонсор “Аартыка суоллара” хааһына тэрилтэтэ, генеральнай дириэктэр Владимир Валерьевич Чусовской). “Аартыка суоллара” хааһына тэрилтэтин бэрэстэбиитэлэ бэлиэтээбитинэн, бу улахан ааты Аартыкаҕа үлэлиир, хоту дойду олоҕун-дьаһаҕын туһугар күннэтэ туруулаһар дьон ылара ураты суолталаах. Маны этэн туран, тэрилтэлэрэ үлэлээбитэ быйыл номнуо 10-с сыла буолбутун, төрүттээччинэн Владимир Членов буоларын санатта.
“Аартыка бастыҥ уопсастыбанньыга” аат Булуҥ оройуонун биир дойдулаахтарын түмсүүтүн салайааччы солбуйааччытыгар Сергей Иосифович Шумиловка иҥэрилиннэ (спонсор Владимир Членов кэргэнэ Ирина Юрьевна Членова). Сергей Иосифович олус истиҥник Владимир Михайлович туһунан аҕынна: “Аартыка сайдыытыгар ис дууһатынан ыалдьар, туох баар күүһүн, кыаҕын, билиитин ууран туран үлэлиирэ. Мин кинилиин Быковскай нэһилиэгэр баһылыктыыр кэммэр алтыһан турардаахпын. Талааннах салайааччы, чаҕылхай киһи этэ”, - диэн эттэ.
“Аартыка эрэлэ” номинация А.К.Ильинов аатынан родовой община салайааччытыгар Раиса Анатольевна Ильиноваҕа туттарылынна (спонсор “Якутскэнерго” АУо генеральнай дириэктэрэ, норуот дьокутаата Гаврил Николаевич Алексеев). Бу эдэркээн кыыс удьуор табаһыттар дьиэ кэргэннэриттэн төрүттээх буолан, Дьокуускай куоракка таба иитиинэн дьарыктанар, "Арктика-13" этнотуристическай баазаны тэрийэн үлэлэтэр.
Санатан эттэххэ, Владимир Членов биллиилээх судаарыстыбаннай уонна бэлитиичэскэй диэйэтэл, “Саха Сирин Аартыката” полярниктар ассоциацияларын” төрүттээччи, бэрэсидьиэнэ, Ил Түмэн IV, V, VI ыҥырыылаах мунньаҕын дьокутаата, РФ тырааныспарын бочуоттаах үлэһитэ, бочуоттаах полярник, СӨ Норуот хаһаайыстыбатын үтүөлээх үлэһитэ, Булуҥ улууһун бочуоттаах олохтооҕо, “Хотугу сулус” уордьан кавалера.
Ааспыт сыл ыам ыйын 22 күнүгэр Арассыыйа полярниктарын ассоциациятын 10 сылыгар анаммыт “Саха сирин Аартыката” уопсастыбаннай тэрилтэ үөрүүлээх тэрээһинин кэмигэр бириэмийэлэри аан бастакытын туттарбыттара.
Тэрээһин туһунан сиһилии “Ил Түмэн” хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
