Остуоруйа олоҥхоһут, норуот ырыаһыта, этнограф Үстүүн Нохсоороп «Сыанаканан сыһыылаах, холуопканан хонуулаах, сылгы-сүөһү оҕото Дыырай Бэргэн» олоҥхотугар олоҕурда.
Арассыыйа Федерациятын уонна Саха Өрөспүүбүлүкэтин үтүөлээх артыыһа, өрөспүүбүлүкэ Судаарыстыбаннай цииркатын уус-уран салайааччыта, дириэктэрэ Сергей Васильевич Расторгуев остуоруйа иннинэ көрөөччүлэргэ билиһиннэрбитинэн, бу кэлэктиип норуоттар икки ардыларынааҕы үһүс бырайыактара. Туруорууга 70 цииркэ артыыһа, оҕолорго аналлаах цирковой устуудьуйа 40 иитиллээчилэрэ кыттыыны ылаллар. Олоҥхону көрөөччү барыта өйдүүрүгэр анаан нууччалыы табыгастаахтык тылбаастаабыттар. Ааспыт сылга Амма улууһугар ыытыллыбыт Олоҥхо ыһыаҕар маҥнайгы хардыыны оҥорон, бу олоҥхону туруорбуттара көрөөччүлэр биһирэбиллэрин ылбыт.
Кылгастык билиһиннэрдэххэ, Айыы дойдутун бухатыыра, халлаан кынаттаах биэтин оҕото, Орто туруу бараан дойду хотуна Аан Алахчын Хотун ииппит уола Дыырай Бэргэн сүрүн дьоруой. Аллараа дойду күтүр абааһыта, кубулҕаттаах тойоно Ардьамаан Дьардьамаан кэрэчээн кыыһы Айталыын Куону уоран ылан аллараа дойдуга күрэтэр. Кинилэри утары Орто дойду сырдык бухатыырдара туруналлар, Дыырай Бэргэн тапталлаах кэргэнин босхолуурга сананаллар. Биэс миэтэрэ үрдүктээх, үс төбөлөөх Луо Балык утары киирсэн, сырдык өрө күөрэйэригэр элбэх моһоллору, киирсиилэри көрүстүлэр.
Дьэ, кырдьык даҕаны, ураты туруоруу көрдөрүлүннэ! Көрөөччүлэр аныгылыы муусуканан доҕуһуоллаах, цииркэ артыыстарын чаҕылхай нүөмэрдэринэн олоҥхону отой атын хараҕынан көрдүбүт! Саала иһэ сөхпүт-махтайбыт саҥа аллайыыларынан, ытыс хабыллар тыаһынан ньиргийэн олордо.
Дьэ, кырдьык саамай хоту сытар цииркэ артыыстарын маастарыстыбалара киһини эрэ сөхтөрөр. Ол туоһутунан кинилэр элбэх куонкурустарга, бэстибээллэргэ кыайыылара да буолар.
Холобурдаан эттэххэ, Саха Өрөспүүбүлүкэтин үтүөлээх артыыһа Александр Посельскай салайыытынан “Хоту дойду тыына” салгын маачталарыгар акробаттар толорбут нүөмэрдэрэ “Артист” диэн Юрий Никулин аатынан Москубатааҕы цииркэ I норуоттар икки ардыларынааҕы бэстибээлин уонна Казахстаҥҥа ыытыллыбыт “Эхо Азии” цииркэ ускуустубатын XIV норуоттар икки ардыларынааҕы бэстибээлин боруонса призердара.
Саха Өрөспүүбүлүкэтин култууратын туйгуна Роман Романов салайааччылаах жонглердар триолара "ALMATY CIRCUS FESTIVAL" Казахстаҥҥа ыытыллыбыт I норуоттар икки ардыларынааҕы цииркэ бэстибээлин “Кыһыл көмүс бириис” хаһаайыттара, “Артист” диэн Никулин аатынан Москубатааҕы цииркэ II норуоттар икки ардыларынааҕы бэстибээл боруонса призердара.
Саха Өрөспүүбүлүкэтин култууратын туйгуна Владимир Куприянов салайыытынан “Дуо Селестия” нүөмэр «МАМОНТёнок-2024» VII норуоттар икки ардыларынааҕы цииркэ бэстибээлин “Кыһыл көмүс бириис” хаһаайыттара, III Минскэйгэ ыытыллыбыт цииркэ ускуустубатын норуоттар икки ардыларынааҕы бэстибээлигэр Норуоттар икки ардыларынааҕы артыыстар агенстволара туруорбут анал бириистэрин хаһаайыттара.
Остуоруйа кылаабынай режиссера, бырайыак салайааччыта Арассыыйа Федерациятын уонна Арассыыйа Федерациятын уонна Саха Өрөспүүбүлүкэтин үтүөлээх артыыһа -- Сергей Расторгуев.
Туруорааччы режиссер – Саха Өрөспүүбүлүкэтин ускуустубатын үтүөлээх диэйэтэлэ Мария Харлампьева-Попова.
Кылаабынай хореограф – Саха Өрөспүүбүлүкэтин култууратын туйгуна Марияна Саморцева.
Кылаабынай худуоһунньук – Саха Өрөспүүбүлүкэтин култууратын туйгуна Петр Винокуров;
Муусука композицияларын ааптара, аранжировщик – Саха Өрөспүүбүлүкэтин култууратын туйгуна Константин Васильев
“Оллоон” бөлөх муусукаҕа салайааччыта– ускуустубаны үөрэтиигэ хандьыдаат Виктория Григорьева.
«АРКТИК ЦИРК» оҕолорго цииркэ устуудьуйатын салайааччыта Марианна Еремеева.
Олоҥхо эйгэтин үөскэтэр, олоҥхо суолтатын үрдэтэр улахан, киэҥ таһымнаах бырайыак саҕаланна. Олоҥхону харыстааһыҥҥа, тарҕатыыга, ыччакка тиэрдиигэ нэһилиэнньэ киэҥ араҥатын хабыа, норуоттар икки ардыларынааҕы таһымҥа өссө күүскэ таһаарыа диэн эрэнэбит. Остуоруйаны көтүппэккэ сылдьаргытыгар ыҥырабыт!
Кулун тутар 23 күнүгэр 12.00 уонна 15.00 чаастан
Кулун тутар 26 күнүттэн 30 күнүгэр диэри күнүс 15.00 чаастан
Муус устар 5 күнүгэр киэһэ 18.00 чаастан
Муус устар 13, 20, 27 күннэригэр 12.00 чаастан кэлэн көрүҥ, сэргэхсийиҥ!
Билсэр нүөмэрдэргит: 735-537; 42-95-68
Ааптар хаартыскаҕа түһэриилэрэ.
-
4
-
0
-
0
-
0
-
0
-
0
