Саха Сиригэр бастакытын ыытыллыбыт күөлү канаат устун хааман туорааһыны көрөөрү Таалай күөл кытылыгар дьон тоҕуоруһа муһунна. Бу күн тыаллаах буолан, үгүс киһи тэрээһин буолбата буолуо диэн долгуйа кэтэстэ. Ол эрээри, былааннаммыт тэрээһин ыытылынна уонна мэник тыал көрөөччүлэргэ артыыс иһин өссө күүстээх долгуйууну, кутталы күүркэттэ.
Тэрээһини биллиилээх ырыаһыттар Ника, Джида, Виталий Очиров уонна саха сыыркатын артыыстара киэргэттилэр. Онтон Таалай күөлү СӨ Судаарыстыбаннай сыыркатын артыыһа, СӨ култууратын туйгуна, Хапсаҕайга успуорт маастара Владимир Степанов канаатынан хааман туораата.
Владимир канаакка турарыгар тыал арыый да уоскуйбут курдук буолан ылбыта, онтон суолун ортотугар күүһүрэн, тардыллыбыт быаны хамсатан, көрөөччүлэри ыксата сырытта. Ол эрээри, канатоходец холку көрүҥүн ыһыктыбакка бэрт эрэллээхтик уҥуоргу кытыл биэтэгэр тиийбитигэр, дьон-сэргэ «маладьыас» диэн хаһыылара уонна ытыстарын тыаһа күөл үрдүнэн уруйдуу көттө.
Саха сыыркатын тэрээһинэ үрдүк таһымнаахтык ыытылынна, итиэннэ дьоҥҥо «биһиги чахчы фантастиканы илэ оҥорор кыахтаах дьоннордоохпут» диэн бигэргэттэ.
Хаартыскалар СӨ Судаарыстыбаннай сыыркатын саайтыттан
-
0
-
1
-
0
-
0
-
0
-
0
