25 сыл устата саас ахсын Саха Сиригэр Аҕа күнүн иннинэ ыытыллар үтүө үгэскэ кубулуйбут тэрээһин саамай сымса, күүстээх, тулуурдаах уонна дьулуурдаах аҕалары уолаттарын кытары түмэ тардар. Быйылгы күрэхтэһиигэ Амма, Үөһээ Бүлүү, Бүлүү, Горнай, Кэбээйи, Ленскэй, Мэҥэ Хаҥалас, Нам, Ньурба, Өлүөхүмэ, Өлөөн, Таатта, Уус Алдан, Хаҥалас, Чурапчы улуустарыттан уонна Дьокуускайтан хамаандалар илин кэлин түһүстүлэр.
Күрэхтэһиигэ аҕалар уолаттарын кытта эр дьон сатабылын көрдөрдүлэр. Бэрэбинэни суоруулар, эрбээтилэр уонна хайыттылар, ойбон аллардылар, остуолбаҕа ытыннылар, кулуһуҥҥа чаанньыгы оргуттулар, булчут биатлонугар кииристилэр.
Судьуйалар састааптара даҕаны таһымнаах. Ол курдук, Горнай улууһугар өр кэмҥэ физкултуура уонна успуорт управлениетыгар салайааччылаабыт, Горнай улууһун Мунньаҕын алтыс, сэттис ыҥырыытыгар дьокутааттаабыт Ариан Алексеевич Александров үлэлээтэ. Кини бэйэтэ Аҕа күрэҕин үс төгүллээх кыттыылааҕа буолар:
-- Мин 2014, 2015, 2016 сылларга Уус Алдаҥҥа, Аммаҕа уонна Тааттаҕа ыытыллыбыт өрөспүүбүлүкэтээҕи Аҕа күрэҕэр киирсибит дьоллоохпун. Бу күрэхтэһиилэргэ үһүөннэригэр миэстэлэспитим. Билигин Дьокуускай куоракка үлэлиибин, өрөспүүбүлүкэтээҕи Аҕалар Лигаларыгар көмөлөһөбүн. Үлэ министиэристибэтин көрдөһүүтүнэн судьуйалыы сылдьабын. Күрэхтэһэ сылдьар 19 хамаанда кыттааччыларын туруктара үчүгэй. Бары тэҥ баайыылаах буоланнар, бу бүтэһик түһүмэххэ диэри чөмпүйүөн да, призер да быһаарыллыбакка турар. Тэрээһин сыл аайы тупсан иһэр. Быйылгы үбүлүөйдээх күрэхтэһии куоракка ыытыллыбыта олус үчүгэй. Элбэх көрөөччүнү, ыалдьааччыны, успуорду сэҥээрээччини түмэ тарта.
-
0
-
0
-
0
-
0
-
0
-
0
