25 сыл устата саас ахсын Саха Сиригэр Аҕа күнүн иннинэ ыытыллар үтүө үгэскэ кубулуйбут тэрээһин саамай сымса, күүстээх, тулуурдаах уонна дьулуурдаа аҕалары уолаттарын кытары түмэ тардар. Быйылгы күрэхтэһиигэ Амма, Үөһээ Бүлүү, Бүлүү, Горнай, Кэбээйи, Ленскэй, Мэҥэ Хаҥалас, Нам, Ньурба, Өлүөхүмэ, Өлөөн, Таатта, Уус Алдан, Хаҥалас, Чурапчы улуустарыттан уонна Дьокуускайтан хамаандалар илин кэлин түһүстүлэр.
Хас биирдии түһүмэххэ ыалдьааччылар ыһыылара-хаһыылара, кыайыылаахтары уруйдуур саҥа аллайыылара, сөкүүндэ аҥаарыттан кыранан хотторуу абаккатын тэҥҥэ үллэстиилэрэ икки күс устата тохтоло суох ньиргийдэ.
Амма улууһуттан икки хамаанда кыттыбыт буолан, улахан бөлөх өйүү кэлбит. Амма Чакырыттан Василий Лобанов санаатын маннык үллэстэр:
-- Икки дьиэ кэргэҥҥэ ыалдьа сылдьабыт: Николай, Айсен Алексеевтарга уонна Николай, Аркадий Федоровтарга. Бу икки хамаанда иккиэн чакырдар. Быйыл улууска ыытыллыбыт сүүмэрдиир күрэхтэһиигэ Чакыртан үс хамаанда турбута уонна үһүөн бириистээх миэстэҕэ тиксибиттэрэ. Биир кыайыылаах хамаанда манна кытта сылдьар. Маны сэргэ, былырыын өрөспүүбүлүкэтээҕи Аҕа күрэҕэр кыайбыт Федоровтар кыайыылаах быһыытынан путевкалаахтар этэ. Онон быйыл икки хамаанданы улуустан туруордубут. Олус тыҥааһыннаах киирсиилэр, дьоммут бэлэмнэммиттэрэ биллэр эрээри, хамаандалар бары олус күүстээхтэр.
-
0
-
0
-
0
-
0
-
0
-
0
