Ил Түмэн Байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэтин бэрэссэдээтэлэ – Ил Түмэн Бэрэссэдээтэлин солбуйааччы Александр Подголов биэс ини-бии Соколовтарга анаммыт өйдөбүнньүк арыллыытыгар кытынна.
Дьокуускай куорат Кыайыы пааркатыгар Орджоникидзе (Хаҥалас) улууһун Еланка диэн кыра дэриэбинэтиттэн төрүттээх биэс ини-бии буойуннарга аналлаах өйдөбүнньүк арыллыыта үөрүүлээх быһыыга-майгыга ыытылынна. Илья, Николай, Дмитрий, Егор уонна Иван Соколовтар фроҥҥа биир күн ыҥырыллыбыттар. Биир чааска түбэһэн, бэйэ-бэйэлэрин өйөнсөн Берлиҥҥэ тиийбиттэр. Сэрии уотун ортотунан ааһан, Кыайыы көтөллөнөн эргиллэн кэлбиттэрэ хорсун быһыы, бырааттыы сыһыан холобура буолар.
Өйдөбүнньүгү арыйар чиэс буойун ини-биилэр аймахтарыгар: Владимир Иннокентьевич Соколовка, Раиса Ивановна Вороноваҕа (Иван Соколов кыыһыгар) уонна Анатолий Дмитриевич Соколовка (Дмитрий Соколов уолугар) бэрилиннэ.
– Өйдөбүнньүккэ ини-биилэр ааттара-суоллара үйэлэргэ хаалардыы сурулунна, кинилэр хорсун быһыылара Саха Сиригэр эрэ буолбакка, дойдубут устуоруйатын биир чулуу кэрчигэ буолар. Бу тэрээһиҥҥэ Соколовтар дьиэ кэргэн аймахтарын истиҥ, киһини, уйадытар ахтыылара хас биирдии көрөөччүнү долгутта, -- диэн Александр Подголов бэйэтин тэлэгэрээм-ханаалыгар суруйда.
Хаартыска: Александр Подголов бэйэтин тэлэгэрээм-ханаалыттан
-
0
-
0
-
0
-
0
-
0
-
0
