Ил Түмэн Төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева Кыайыы пааркатыгар Аҕа дойду Улуу сэриитин биллиилээх снайпера Иван Николаевич Кульбертиновка анаммыт пааматынньыкка сибэкки дьөрбөтүн ууруу сиэригэр-туомугар кыттыбытын туһунан тэлэгэрээм-ханаалыгар иһитиннэрдэ.
Иван Кульбертиновка анаммыт пааматынньык таһыгар бастыҥ снайпер биир дойдулаахтара, аймахтара, куорат олохтоохторо муһуннулар. Иван Николаевич 400-тэн тахса фашиһы кыргыбыт дьоруой буолар. Киниттэн өстөөхтөр уоттан куттанар кэриэтэ куттаналлара. “Сэрэниҥ, Кульберт!”, “Болҕойуҥ. Түүҥҥү мэкчиргэ!” – диэн суруйан бэлиэ туруораллара биллэр.
– Эбэҥки норуотун чулуу уола хорсун быһыы, тулуур, дойдуга бэриниилээх буолуу холобурун көрдөрбүтэ, хотугу эргимтэ аҕыйах ахсааннаах норуоттарын биир сомоҕо гына түмпүтэ. Ону ытыктаан, быйыл бэһис сылын Эбэҥкилэр ассоциациялара бу үөрүүлээх тэрээһини тэрийдэ. Билигин даҕаны Иван Николаевич бэйэтин тула эдэр дьону түмэр, ыччаты саҥа кыайыыларга сирдиир. Анал байыаннай дьайыы толоонугар уолаттарбыт бэргэнник ытар снайпердарынан биллэллэр, кинилэр кыайыыларын туһунан өссө даҕаны истиэхпит турдаҕа.
Кульбертинов аата Москубатааҕы байыаннай түмэлгэ Аҕа дойду Улуу сэриитигэр үрдүк көрдөрүүлээх снайпердар кыһыл көмүс буукубаларынан суруллубут испииһэктэригэр киллэриллибитэ. Бэйэтэ чулуу снайпер эрэ буолбакка, эдэр байыастары бэргэнник ытарга үөрэтэрэ, кинилэргэ настаабынньыктыыра. Өстөөхтөр аҥардас кини аатын даҕаны иһиттэхтэринэ, өлөрдүү куттаналлара.
Иван Николаевич Кульбертинов киһи быһыытынан олус сэмэйэ, сэриигэ бииргэ сылдьар дьонугар кыайыыга эрэли саҕара. Кини өрөспүүбүлүкэбит киэн туттуута буолар, аата үйэтитиллэр. Кини аатын Дьокуускай куорат биир саамай уһун уулуссата сүгэр. Быйыл төрөөбүт-үөскээбит нэһилиэгэр, Өлүөхүмэ улууһун Тээнэтигэр, Иван Кульбертинов аатын сүгэр оскуола-уһуйаан саҥа дьиэтин тутуута саҕаланыаҕа, – диэтэ норуот дьокутаата.
Хаартыска: Елена Голомарева тэлэгэрээм ханаалыттан
-
1
-
0
-
0
-
0
-
0
-
0
