-- Күндү бар дьонум, биир дойдулаахтарым, ытыктабыллаах аҕам саастаах эдьиийдэрим-убайдарым, бииргэ оонньоон-көрүлээн, үлэлээн-хамсаан улааппыт бэйэм көлүөнэ дьоно, элбэҕи күүтэр-эрэнэр, кэнэҕэски эрэлбит, улууспут кэнчээри ыччата уонна оҕолор, улууспут бука бары олохтоохторо – бүгүн биһиэхэ, абыйдарга, ыам ыйын 25 күнэ -ураты бэлиэ күн – төрөөбүт-үөскээбит Абыйбыт улууhа төрүттэммитэ 95 сылын туолла. Улууспут дьаһалтатын уонна тус бэйэм ааппыттан өрөгөйдөөх үбүлүөйбүтүнэн итиитик-истиҥник эҕэрдэлиибин!
Улууспут төрүттэммитэ 95 сыллаах үбүлүөйэ Арассыыйаҕа Аҕа дойдуну, Саха Сиригэр Ийэ дойдуну көмүскээччилэр сылларыгар, Аҕа дойду Улуу сэриитигэр Өрөгөйдөөх Улуу Кыайыыбыт 80 сыллаах үбүлүөйүгэр бэлиэтэнэринэн ураты суолталаах. Быйылгы сылтан саҕалаан улууспут 100 сыллаах үйэлээх үбүлүөйүн чиэстээхтик көрсүүгэ сыал-сорук торумнанан бэлэмнэнии үлэтэ-хамнаһа ыытылла турар.
Бу ааспыт кэрчик кэмҥэ дойдубут, өрөспүүбүлүкэбит уонна биһиги улууспут олус уустуктардаах, күчүмэҕэйдэрдээх сыллары даҕаны, элбэх үчүгэй түмүктэрдээх, улахан кыайыылардаах да кэмнэри аастылар. 95 сыллаах баай история кэрчиктэрэ абыйдар өрүү үлэҕэ көхтөөхтөрүн, үөрэххэ, сырдыкка-ырааска, үүнүүгэ-сайдыыга күүстээх дьулуурдаахтарын кэрэһэлииллэр. Ол да иһин билигин биһиги баай төрдүлээх-уустаах, аар-саарга аатырбыт суон сурахтаах, үлэнэн ааттарын үйэтиппит үтүө дьонноохпутунан киэн туттабыт уонна махтанабыт!
Күндү доҕоттор, улууспут инники дьылҕатыгар, сайдыытыгар бииргэ түмсэн үлэлиэҕиҥ, улууспут сайдыы саҥа таһымыгар тахсара хас биирдиибититтэн тутулуктааҕын санаан туран, онно улуус хас биирдии олохтооҕо үтүө санаатынан көмөлөһүө, өссө да чаҕылхай ситиһиилэргитинэн төрөөбүт улууспутун ааттатыахтара диэн эрэнэбин!
Бука барыгытыгар чэгиэн буолууну баҕарабын, ылсыбыт дьыалаҕыт таһаарыылаах буоллун, олоххо дьулуурдаах, айымньылаах, дьоллоох буолуҥ!
Хаартыска: Абый улууһун дьаһалтатыттан
-
0
-
0
-
0
-
0
-
0
-
0
