Общество

 Абый улууһун оскуолалара  бу бырайыакка бары кыттыһаллар.

Биир дойдулаахпыт, байыаннай дьайыыга олоҕун толук уурбут хорсун буойун Бережнов Артур Семенович сырдык аатын үйэтитэр сыаллаах «Дьоруой паартата» Ураһалаах орто оскуолатыгар биир бастакынан туруоруллубута.

Муҥурдаах орто оскуолатыгар паарта анал байыаннай дьайыы кыттыылааҕар, оскуола выпускнигар Карпов Иван Николаевичка ананна. Аныгылыы куар кодунан киирэн герой туһунан суруйуулары, чугас дьонун ахтыытын ааҕыахха, көрүөххэ сөп.

Т.н.д А.Е.Слепцов аатынан Абый орто оскуолатыгар Аҕа дойду сэриитин кыттыылаахтарыгар, биир дойдулаахпытыгар Бережнов Алексей Константиновичка, Ефимов Гавриил Николаевичка ананан Дьоруой паартата турда. Паартаҕа маҥнайгынан олорор чиэскэ туйгун үөрэнээччи, оскуола выпускнига Вероника Дохунаева уонна оскуола боруогун маҥнайгытын атыллыыр Костя Бережновка тигистэ.

С.Ф. Марков аатынан  Уолбут орто оскуолатыгар сана үөрэх сыла эмиэ патриотическай тэрээһинтэн саҕаланна. Оскуола үөрэнээччилэрэ, учууталлара Аҕа дойду сэриитин ветерана, үтүөлээх учуутал Семен Федорович Марков уонна Уолбут оскуолатын 2005 сыллаах выпускнига, анал байыаннай дьайыыга сырдык тыынын толук уурбут чулуу буойун Борис Борисович Слепцов ааттарыгар сүгүрүйдүлэр.

Майыар орто оскуолатыгар улууска бастакынан Дьоруой паартата турбута. Паарта биир дойдулаахтарыгар Слепцов Ким Спиридоновичка анаммыта. Ким Слепцов — анал байыаннай дьайыы кыттыылааҕа.

Никодим Николаевич Ефимов аатын сүгэр Белай Гора гимназиятыгар саллаат паартата Аҕа дойду сэриитин кыттыылааҕар Ефимов Гаврил Николаевичка анаммыт.

Дьоруой паартатыгар олорор чиэһи үөрэххэ, успуорка, оскуола, нэһилиэк уопсастыбаннай олоҕор чаҕылхай, ситиһиилээх үөрэнээччилэр сүгүөхтэрэ. «Дьоруой паартата» бырайыак көлүөнэлэри ситимниир. Бу бырайыакка Абый улууһун оскуолалара бастакынан кыттыспыттарыгар үөрэбит,  киэн туттабыт. Геройдар албан ааттарын үйэтитэр биһиги, тыыннаахтар, ытык иэспит буолар.

Анна ЧИРКОВА, Абый.