Сахалыы тыыннаах сонун түмсүүгэ элбэх ыалдьыт кэлэн тэрээһин үрдүк таһымҥа ааста. Ол курдук Амма улууһун баһылыгын социальнай боппуруостарга солбуйааччыта Николай Ларионов кэлэн эҕэрдэ тылын тириэрдэн туран бу олус туһалаах тэрээһин буоларын бэлиэтээтэ уонна инники тохтообокко салҕанан бара турарыгар баҕа санаатын тириэртэ. Бу эрэ күҥҥэ анаан “Один день в армии” бырайыак ааптара, “Эрэл” байыаннай кулууп салайааччыта Дмитрий Петухов бэйэтин илиитинэн оҥорбут түөскэ кэтиллэр бэртээхэй ис хоһоонноох харысхалын уонна хартыынатын ыалдьыттарга бэлэхтээтэ. Бу күн уолаттар этэрээттэргэ арахсаннар араас былаһааккаларга сырыттылар. Ол курдук холобура Амматааҕы киин балыыһа реаниматолог бырааһа Петр Табунанов эр киһи доруобуйатыгар, оҕо искусствотын оскуолатын преподвателэ Валерий Кириллин сахалыы инструменнар тустарынан иһиттилэр, кииннэммит бибилэтиэкэ тиһигин дириэктэрэ Прокопий Прокопьев Амма улууһун историятын билиһиннэрдэ, улуус дьаһалтатын административнай хамыыһыйатын сэкэрэтээрэ Анатолий Стручков Ийэ дойдуга бэриниилээх буолуу диэн тугун туһунан былаһааккалары үлэлэттилэр.
Бу күн эбиэт барыта эр дьон аҕалбыт сахалыы астара буолан, уолаттар тото-хана аһаабыттара. Минньигэстик аһаан баран, өбүгэлэрбит оонньууларыгар бэйэ бэйэлэрин кытта күрэхтэстилэр. Тэрээһин саамай долгутуулаах түгэнинэн анал байыаннай дьайыы кыттыылаахтара, оскуола выпускниктара Владимир Алексеев, Алексей Лобанов, Денис Васильев кэлэн ыалдьыттаабыттара, санааларын уолаттарга тириэрдибиттэрэ буолла.
Бу бырайыакка эр дьон эрэ кыттар буолан ураты. Тэрээһини эмиэ оскуола выпускнига Егор Бубякин салайан ыытта. Оҕолор, тэрийээччилэр бары сахалыы таҥнан кэлэн, сахалыы тыыннаах барда. Чахчы уол оҕоҕо элбэх үөрэҕи, холобуру тылынан буолбакка, дьыаланан көрдөрүү буолла. Саха ыччата кыаҕа, мындыра, тулуура бу кун барыта көһүннэ, ырытыллынна. Ордук чуолаан Амма 1№-дээх оскуолатын уолаттара, эр дьон учууталлара, выпускниктара кыахтаахтарын өссө төгүл дакаастаатылар, көрдөрдүлэр.
Туйаара НИКИФОРОВА, "Амма олоҕо".
-
0
-
0
-
0
-
0
-
0
-
0
