Мэҥэ бэлиэ Куокуну нэһилиэгин кэрэ көстүүлээх искибиэригэр турда. Үөрүүлээх тэрээһиҥҥэ Сунтаар улууһун баһылыгын социальнай уонна имеджевай бэлиитикэҕэ саҥа анаммыт солбуйааччыта Мирослав Иванов кыттыыны ылла. Кини Егор Молотков сыдьааннарын истиҥник эҕэрдэлээтэ уонна эһэлэрэ Сунтаар улууһугар бэлиэ суолу хаалларбытын, үтүө өҥөтүн туһунан эттэ.
Егор Михайлович Молотков бэйэтин кэмигэр улаханнык биллэр, ытыктанар киһи эбит. Кини историяҕа киирбит сахалар бастакы сийиэстэрин Бүлүү уокуругуттан соҕотох кыттыылааҕа буолар. А.Е.Кулаковскайы, И.Я.Строду кытта ыкса билсибит киһинэн биллэр. Куокунуга чулуу киһилэрин аатынан уулусса баар, ону тэҥэ, оҕолорго научнай-практическай конференция тэрийэллэр. Былырыыҥҥыттан Куокуну оскуолатын үөрэнээччитигэр Молотков аатынан стипендия ананар буолбута. Маны барытын Куокуну олохтоохторо уонна үтүө киһи сыдьааннара көҕүлүүллэр. Онон Молотков бэйэтин кэнниттэн, кини үтүө аатын ааттатар ыччаты хааллартаабыт. Үгүстэрэ эһэлэрин утумнаан билиигэ, сырдыкка тардыһыылаахтар, өрөспүүбүлүкэҕэ биллэр-көстөр дьон. Билигин даҕаны Куокунуну кытта сибээстэрин быспаттар, хос, хос эһэлэрин аатын үйэтитиигэ тэҥҥэ үлэлэһэллэр. Диана Михайловна Попова Егор Молотков хос сиэнэ аймах дьон аатыттан мэҥэ бэлиэ баар буоларыгар үлэлэспит, Молотков аатын үйэтитиигэ үлэлэһэр дьоҥҥо махтал тылын эттэ, уонна дьиэ кэргэн аатыттан сэмэй бэлэхтэри туттарда. Ону тэҥэ, Куокуну искибиэригэр мас арааһын олордууга аҕалбыттарын кэлбит ыалдьыттары кытта олортулар. Бу курдук Молотков сыдьааннара элбэх буолан кэлэн историяҕа бэлиэ суолу хаалларбыт ытык киһилэрин аатын чиэстээтилэр. Салгыы даҕаны Сунтаар улууһун кытта үйэтитиигэ үлэ ыытыахтарын эттилэр.
Мира АФАНАСЬЕВА
-
0
-
0
-
0
-
0
-
0
-
0
