Бэлиэ туруоруу П.Н. уонна Н.Е.Самсоновтар ааттарын сүгэр Хатас орто оскуолатын 110 сылыгар, Саха АССР үтүөлээх учуутала, норуот үөрэҕириитин туйгуна, Ленин орденын кавалера Надежда Евменьевна Самсонова 125 сааһыгар, Дьокуускайга үөрэҕирии 100 сылыгар сөп түбэһиннэриллибит.
Драма сүрүн ис хоһооно үтүөлээх учууталлар Парфений Никитич уонна Надежда Ерменьевна Самсоновтар Саха Сиригэр, чуолаан Хатас орто оскуолатыгар уонна нэһилиэгэр үөрэҕириини сайыннарыыга олохторун, өйдөрүн-санааларын, сатабылларын ууран туран, олох ыарахаттарын бииргэ туораабыт кэмнэрин ойуулаан көрдөрөр айымньы.
Хартыына 1928 сыллаахха Парфений Никитич П.А.Ойуунускайдыын көрсүһүүтүттэн, учууталлыыр алгыс тылларын Улуу киһиттэн ылбытыттан саҕаланар, сэрии ыар сылларын нөҥүлээн Хатаска олохсуйуутугар тиийэ ойууланар.
Оруоллары Хатас орто оскуолатын учууталлара уонна үөрэнээччилэрэ толордулар.
Ааптар докумуоннарга, алтыспыт дьон, үөрэммит оҕолор ахтыыларыгар олоҕурбута ураты суолталаахтык көһүннэ.
Билим академиятын иһинэн үлэлиир төрүт тыллары үөрэтии, харыстааһын уонна сайыннарыы киинин салайааччыта, Ил Түмэн алтыс ыҥырыылаах мунньаҕын дьокутаата, педагогическай наукалар дуоктардара Феодосия Габышева испэктээги олус сэҥээрэ, долгуйа көрбүтүн бэлиэтээтэ:
-- Парфений Никитич уонна Надежда Ерменьевна Самсоновтар Сахабыт Сиригэр үөрэҕирии систиэмэтэ сайдыытыгар олус улахан суолталаах үлэлэри оҥорбут дьоммут буолаллар. Кинилэр иккиэн, өссө ол ыраах сылларга, икки тылынан үөрэтии тосхоллорун уурбуттара. Ол үлэлэр, үөрэтиилэр, чинчийиилэр билигин олоххо киирэн, оскуолаларга икки тылынан үөрэтии барар, -- диэн эттэ.
Хатас орто оскуолатын дириэктэрэ Николай Слепцов испэктээк кэнниттэн мустубут дьоҥҥо анаан кылгастык билиһиннэрдэ: "Былырыын “Тускул” сынньалаҥ киинин салайааччыта Валентин Азотович Чепалов наһаа үчүгэй этиилээх миэхэ киирэ сырытта. Ол курдук, ытыктыыр дьоммут Парфений Никитич уонна Надежда Ерменьевна Самсоновтар ааттарын үйэтитэргэ Сахабыт Сирин норуодунай суруйааччытыгар Дмитрий Наумовка көрдөһөн испэктээк суруйтарыах, сыанаҕа туруоруох диэбитэ. Дмитрий Федосеевич этиибитин истэн, ылынан, сөбүлэһэн, үлэбит күөстүү оргуйан саҕалаабыта. Испэктээк туруорааччы-режиссерунан буоларыгар эбии үөрэхтээһин үлэһитин Прокопий Алексеевич Николаевы көрдөспүппүт. Тутаах үлэһиппит Ньурба Акана нэһилиэгиттэн төрүттээх, култуура эйгэтигэр үөрэхтээх уонна үлэлээбит буолан эрэлбит улахан этэ. Бастаан олус долгуйбута эрээри, ылыммыта. Испэктээккэ артыыс быһыытынан Хатас орто оскуолатын учууталлара уонна үөрэнэччилэрэ кытыннылар. Сахабыт Сирэ барыта киэн туттар тыйаатырыгар испэктээги сүрэхтээбиппититтэн олус долгуйдубут. Өссө биир үөрүүбүт, бүгүн оскуолабыт иннигэр, Парфений Никитич уонна Надежда Ерменьевна Самсоновтарга икки бюст арыйдыбыт. Бүгүҥҥү долгутуулаах күммүтүнэн кэллэктииппэр, “Тускул” култуура киинин үлэһиттэригэр барҕа махтал тылларбын тиэрдэбин”, - диэн эттэ.
Ааптар хаартыскаҕа түһэриилэрэ
-
0
-
0
-
0
-
0
-
0
-
0
