Мэҥэ Хаҥалас улууһун 2-с Тыыллыма нэһилиэгэр оҕо ахсаанын үксэтии соруга тыын боппуруоһунан буолар. Олохтоох дьаһалта уһуйааҥҥа сылдьар, алын кылааска үөрэнэр оҕолордоох ыалы бөһүөлэккэ көһөн кэлэн олохсуйалларыгар ыҥырар. Босхо олорор дьиэнэн, үлэнэн, оҕолору оскуоланан, уһуйаанынан толору хааччыйалларын туһунан иһитиннэрэр.
Тыа сирин олоҕун көҕүлүүр ураты ыҥырыы туһунан нэһилиэк баһылыга Айсен Спиридонов санаатын бу курдук үллэстэр:
— Олохтоохтор бука бары олус таптыыр Хаатылыма бөһүөлэкпит күн түһэн үҥкүүлүүр кэрэ айылҕалаах эбэ үрдүгэр, бэс чагдаҕа сууланан турар. Чинчийээччилэр бэлиэтииллэринэн, бөһүөлэкпитигэр бэс алта көрүҥэ үүнэр. Онон дойдубут ураты ыраас, чэбдик салгыннаах. Эбэбит көмүс хатырыктааҕынан, бултааҕынан-алтааҕынан биллэр. Нэһилиэкпитигэр алын кылаас оскуолата, уһуйаан үлэлиир. Анал үөрэхтээх учууталлардаахпыт, иитээччилэрдээхпит. Бөһүөлэкпит Майаттан 34 килэмиэтир чугас турар, таас суолунан быстыбат сырыылаахпыт. Олорор дьиэлэр киин ситиминэн ититиилээхтэр, хаарбах дьиэттэн дьону көһөрүү бырагырааматынан тутуллубут икки этээстээх таас дьиэлээхпит.
Биир сүрүн кыһалҕабытынан оҕо ахсаанын аҕыйаҕа буолар. Онон өрөспүүбүлүкэ ханнык баҕар муннугуттан алын кылаас саастаах оҕолордоох ыалы бөһүөлэкпитигэр олохсуйарга ыҥырабыт. Онуоха, дьаһалта өттүттэн босхо дьиэнэн, үлэнэн хааччыйабыт диэн бигэргэтэбит. Олох араас очуруттан соҕотох хаалбыт оҕолордоох ийэлэр, аҕалар, эбэтэр атын сиргэ олохсуйан саҥа кэрчиги саҕалыан баҕалаах ыал, көрсүө-сэмэй дьонноох, саҥа олохтоохторго аһаҕас ааннаах Хаатылыма бөһүөлэгэр көһөн кэлэн олохсуйаргытыгар ыҥырабыт!
Хаатылыма бөһүөлэгэр көһөн олохсуйуон баҕалаах дьон нэһилиэк баһылыгын Айсен Русланович Спиридоновы кытта 89247601773 нүөмэринэн билсиҥ.
Сонун төрдө уонна хаартыска: Изабелла Романова,`"Эркээйи.
-
1
-
0
-
0
-
0
-
0
-
0
