Урукку олох уларыйда, хас биирдии ыалы таарыйыан сөптөөх байыаннай дьайыылар, сүтүк туһунан өйдөбүллэр баар буоллулар. Маннык тыҥааһыннаах кэмҥэ тугу гынарбыт нааданый?
Бастатан туран, чугас дьоҥҥутун кытта сибээскитин, ситимҥитин быспакка кэпсэтэ, билсэ олоруҥ. Ватсаапка кэлэр араас иһитиннэриилэри барытын ыраас манньыакка ылынан, итэҕэйэн иһимэҥ. Көҥүлэ суох миитиннэргэ төрүт кыттыһымаҥ, социальнай ситимнэр нөҥүө тарҕанар биһигини, биһиги дойдубутун араас куһаҕаҥҥа үтэйэргэ, иллээх-эйэлээх олохпутун үрэйэргэ анаммыт «ыҥырыылары» ааҕымаҥ, онно-манны ыытымаҥ, тарҕатымаҥ, сотторон иһиҥ. Дьиэ кэргэттэргитигэр, аймахтаргытгар, биир дойдулаахтаргытыгар эмиэ оннук өйдөтүҥ.
Бары оҕолоох-уруулаах, ыччаттардаах дьоммут. Онон социальнай-экэнэмиичэскэй, политическай боппуруостарга уһуну-киэҥи толкуйдаан, саха сиэринэн киэҥ-холку буолуоҕуҥ, аймалҕаны, айдааны күүркэтимиэҕиҥ.
Бу ыҥырыыны ааҕаҥҥыт биһиги көлүөнэ, патриотическай иитиилээх дьон өйдүөхтэрэ диэн эрэнэбит. Түмсүүлээх буоллахпытына, олох ыарахаттарын бииргэ туоруохпут. Онон күннэтэ буола турар уустук балаһыанньаҕа муудараспытын киллэрэн, биир санаа, уопсай сүбэ тула түмсүөҕүҥ!
Эрэли кытта Алексей Петров уонна өрөспүүбүлүкэ орто оскуолаларын 1990 сыллаахха бүтэрбиттэр түмсүүлэрин («Выпуск-1990») актыыба.
-
2
-
0
-
0
-
0
-
0
-
0
