Мунньаҕы сис кэмитиэт бэрэссэдээтэлин солбуйааччы Захар Никитин иилээн-саҕалаан ыытта. Кыттыыны норуот дьокутааттара, министиэристибэлэр уонна биэдэмэстибэлэр салайааччылара, муниципальнай тэриллиилэр бэрэстэбиитэллэрэ ыллылар.
Сүрүн дакылааты култуурунай нэһилиэстибэ эбийиэктэрин харыстааһын управлениетын салайааччыта Николай Макаров туруорда. Киниттэн кылгастык мунньах туһунан кэпсииригэр көрдөстүбүт:
-- Бүгүҥҥү мунньахха өйдөбүнньүктэри харыстааһынынан дьарыктанар кэллиэгэлэрбит, исписэлиистэр, эспиэрдэр мустаммыт туох кыһалҕалаахпытын кэпсэттибит. Кыһалҕабыт олус элбэх. Өрөспүүбүлүкэ үрдүнэн 1944 өйдөбүнньүктэр бааллар. Ол иһигэр археология, ускуустуба, история пааматынньыктара. Ону биһиги хайдах гынан систиэмэлээн, наардаан бу өйдөбүнньүктэри өрө тардабыт диэн.
Мунньахха эспиэрдэр каадырынан хааччыллыы бэлиитикэтин, үбүлээһини ырыттылар. Улахан болҕомтону Дьокуускай куорат 400 сылыгар уурдубут. Мунньах түмүгүнэн эрэкэмэндээссийэ ылыллыа, онно боппуруостар түмүллэн кэккэ этиилэргэ киириэхтэрэ, иникитин даҕаны бииргэ үлэлиэхпит.
Өйдөбүнньүктэри харыстааһыҥҥа туһуламмыт 73 №-дээх федеральнай сокуон 2022 сылтан үлэлиир. Ол кэмтэн ыла эбиилэр, көҕүрэтиилэр, уларытыылар киирэн бара тураллар. Ол курдук, былырыыҥҥаттан өйдөбүнньүктэри өрөмүөнннээһин, реставрациялааһын арыый судургутук барар буолла.
Биһиги Ил Түмэн судаарыстыбаннай мунньах дьокутааттарын кытары бу сокуоҥҥа ытык сирдэри харыстааһын туһунан пууннар баар буолалларын үөрэтэн эрэбит. Инникитин докумуону ситэрэн баран Госдуумаҕа тахсыахпыт. Биһиги көрүүбүтүнэн, ытык сирдэри харыстааһын “Священные сакральные места” диэн пуунунан бу федеральнай сокуоҥҥа суруллуохтаах, онно үлэлиэһиэхпит, -- диэн эттэ.
Мунньах туһунан сиһилии хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
