Кини кэпсээбитинэн, Пуондаҕа сылын ахсын 23-25 тыһыынча сайаапка киирэр, олортон 10-12% өйөнөр (1,5-2 тыһ. сайаапка). Ортотунан көрдөнөр үп суумата -- 2 мөл. солкуобай.
“Граннарга сайаапка биэрээччилэр миэстэтигэр олорооччулар кыһалҕаларын, кинилэргэ туох көмө ирдэнэрин ордук өйдүүллэр. Быйыл сайаапкалар ис хоһоонноро сүрүннээн дьиэ кэргэни өйөөһүҥҥэ, үөрэҕириигэ, социальнай эйгэҕэ уонна доруобуйа харыстабылыгар туһуланнылар”, - диэн эттэ.
Социальнай эйгэ хас да салааны хабар. Ол иһигэр, доруобуйаларыгар хааччахтаах оҕолорго, инбэлииттэргэ, кырдьаҕас дьоҥҥо, хаайыыттан тахсыбыттарга олохсуйалларыгар, үлэ булуутугар көмө, өйөбүл уонна паллиативнай сулууспаларга өҥөлөр.
Генеральнай дириэктэр сүбэһитэ эбэн эппитинэн, Пуонда 2017 сыл муус устарыттан үлэтин саҕалаабыт. Бу кэмтэн Москубаттан кыттар тэрилтэлэр көрдөрүүлэрэ уларыйбыт. Бастаан утаа кыайыылаахтар истэригэр 57-60% эбит буоллахтарына, билигин бу көрдөрүү 7% тэҥнэспит. Ол эрэн, бу 7 % иһигэр бүтүн Арассыыйа үдүнэн үлэлиир тэрилтэлэр баалларынан, Москуба эрэ иһинэн үлэлээччилэр ахсааннара 4 % тэҥ.
“Дойдубут үрдүнэн кыайыылаахтар каарталарны көрөр буоллахха, бэрэсидьиэн граннарын дойдубут араас муннугар ылан туһаналлара арылыччы көстөр. Биһиги 200 нэһилиэнньэлээх бөһүөлэкэтэргэ кытары грант ылар кыах киллэрдибит. Инньэ гынан, социальнай өйөбүлгэ наадыйар дьоҥҥо көмө муниципалитеттарынан тиийэр буолла”, - диэтэ Татаринов.
-
0
-
0
-
0
-
0
-
0
-
0
