Былырыыҥҥы, 2025 сыллааҕы үлэ туһунан информация Таатта улууһун Тыа сирин көҕүлээһиннэрин өйүүр дирекция салайааччыта Г.Г. Вырдылин, Таатта улууһун ветераннарын сэбиэтин бэрэссэдээтэлэ М. А. Попова, Таатта улууһун депутаттарын сэбиэтин иһинэн баар хонтуруоллуур-суоттуур балаата иниспиэктэрэ С. П. Спиридонова, Тыа сирин көҕүлээһиннэрин өйүүр дирекция сүрүн испэсэлиистэрэ В.И.Колодезникова, А.А. Баишева ыытыллыбыт үлэни сиһилии билиһиннэрдилэр уонна 2026 сыллыыҕы үлэ торумун сүбэлэһии, бэрэбиэркэ түмүгүн билиһиннэрии, ырытыы буолла.
Быйыл ыытыллыбыт СӨ үлэҕэ уонна социальнай сайдыыга министиэристибэтин конкурсун түмүгүнэн Таатта улууһа кыайыылааҕынан ааттанан, республика бюджетыттан 1 мөл 476 тыһ. 751 солк. уонна улуус бюджетыттан “Аҕа саастаах көлүөнэ” муниципальнай сыаллаах программанан 900 тыһ. солк. көрүлүннэ. Программа 3 хайысханан ыытыллыаҕа: күнүскү дьарыктар, социальнай туризм, чэбдигирдэр дьарыктар былааннаналлар. Ол курдук:
1 хайысхаҕа төрүт астары сөргүтэр сыаллаах уонна доруобуйаларыгар туһалаах буоларыгар Дьохсоҕон уонна Таатта нэһилиэгин сиригэр-уотугар эмтээх оту хомуйан пакеттаах чэй уонна собо балык уҥуоҕун хатаран, сублимированнай собо миинин оҥоруута. Ону таһынан тар уонна үрүмэ оҥоруутугар маастар-кылаастар ыытыллыахтара. Спортивнай хайысхаҕа төрүт оҕунан ытыыга дьарык уонна кыһыҥҥы муҥха тэриллэн ыытыллыаҕа.
2 хайысхаҕа “Триада музеев – культурный код Таатты” культурнай- чинчийэр маршрут Чөркөөх — Хадаайы – “Мандар Уус”- духуобунас киинэ музейдарынан тэриллиэҕэ. Хас биирдии маршрут иһинэн араас интэриэһинэй тэрээһиннэр ыытыллыахтара.
3 хайысханан чэбдигирдэр программанан “Коуч йога 2.0” — йога дьарыга тирэх-хамсанар аппарат кэһиллиилээх дьоҥҥо ананан үлэлиэҕэ. Маны таһынан чэбдигирдэр дьарыктар, сөпкө тыыныыга эрчиллиилэр, йога-гимнастиката уонна медитация буолуохтара.
Анал программанан араас туттар маллар кэлэллэрэ былааннанар.
Бу тэрээһиннэр барыта аҕам саастаах дьоҥҥо ытыктабыл бэлиэтэ буолан, улууспут аҕам саастаахтарыгар үөрүүнү аҕаларыгар, чэгиэн туруктаах сылдьалларыгар төһүү күүс буоларыгар саарбахтаабаппыт.
Сонун төрдө уонна хаартыска: "Таатта", В.Власова
-
0
-
0
-
0
-
0
-
0
-
0
