Бүгүн Саха Өрөспүүбүлүкэтин Судаарыстыбаннай Мунньаҕын (Ил Түмэн) норуодунай дьокутаата, «Сахатранснефтегаз» АО генеральнай дириэктэрэ Алексей Колодезников МАХ социальнай ситимигэр Өлүөхүмэ улууһун аграрийдарын өйүүр суһал миэрэлэр тустарынан тиэмэни салҕаата:
«Бырабыыталыстыба бэрэссэдээтэлин солбуйааччы Сергей Васильевич Местников уонна тыа хаһаайыстыбатын миниистирин э.т. Анна Александровна Стручкова кыттыылаах тыа хаһаайыстыбатын кураторын таһымыгар үлэ сүбэ мунньаҕын ыыттыбыт. Улуус дьаһалтатыттан ВКС нөҥүө норуодунай дьокутаат Николай Иванович Кульбертинов, Николай Николаевич Харбин уонна тыа хаһаайыстыбатын управлениетын начаалынньыга Афанасий Петрович Антонов тыл эттилэр.
Санатан аастахха, ааспыт нэдиэлэҕэ оробуочай командировка чэрчитинэн улууска сылдьан, сайыҥҥы халаантан эмсэҕэлээбит Кыыллаах уонна Хоро нэһилиэктэрин аграрийдарын кытта көрсүбүтүм. Биһиги улуустан норуот дьокутааттара уонна улуус дьаһалтата аграрийдарга көмөлөһөр туһугар өрөспүүбүлүкэ бырабыыталыстыбатын кытары бииргэ үлэлэһиибитин салгыахпыт диэн кэпсэппиппит».
Сүбэ мунньах түмүгүнэн сотору кэминэн улууска от бэлэмнээһин хампаанньатын тэрийиигэ өрөспүүбүлүкэ бүддьүөтүттэн сыаллаах үп-харчы ыытыллыаҕа. Көмөнү сүрүннүүр үлэ олохтоох тыа хаһаайыстыбатын управлениетыгар сүктэриллиэҕэ.
«Инньэ гынан, Өлүөхүмэ улууһун аграрийдара соҕотох буолбатахтар, кинилэр кыһалҕаларын кытта бэйэлэрэ эрэ хаалыахтара суоҕа», — диэн норуот дьокутаата Алексей Колодезников бэлиэтээтэ.
Сонун төрдө уонна хаартыска: Ил Тумэн пресс-сулууспата
-
0
-
0
-
0
-
0
-
0
-
0
