Нассынаалынай «Сахатранснефтегаз» хампаанньа генеральнай дириэктэрэ, Ил Түмэҥҥэ «Биир Арассыыйа» баартыйа фракциятын салайааччыта Алексей Колодезников Ил Дархан сыллата ааҕыллар Туһаайыытыгар эппит, 1500 ыал дьиэтигэр ситимнээх гааһы киллэрии соруга бары өттүнэн туолбутун бигэргэттэ.
«Ситиһиллибит түмүктэр хампаанньа кэллэктиибин, бэдэрээтчит тэрилтэлэр уонна куорат, улуус, нэһилиэк дьаһалталарын биир ситимнээх үлэлэринэн хааччылынна. Иннибитигэр бырагыраама саҥа түһүмэҕэ күүтэр. Өрөспүүбүлүкэ холбооһун тэтимин улаатыннара туруоҕа, оттон ситимнээх гаас дьиэлэргэ кэтэһэр дьоҥҥо кэлиэҕэ», — диэтэ Алексей Колодезников.
Быйыл холбооһун сүрүн чааһа өрөспүүбүлүкэ киинигэр — Дьокуускай куоракка тигистэ, манна ас буһарарга уонна оттторго гааһы 860-ча дьиэ кэргэн ылла. Мэҥэ Хаҥалас улууһугар ситимҥэ 145 ыал холбонно, Горнай улууһугар — 134 ыал. Бу кэмҥэ өрөспүүбүлүкэ үгүс улуустарыгар былааннаммыт көрдөрүүлэри аһара түһэн толордулар.
«Социальнай гаастааһын — "Биир Арассыыйа" баартыйа Норуотун бырагырааматын дьоһуннаах хайысхаларыттан биирдэстэрэ. Биһиги кини түмүгүн дьон олоҕор дьиҥнээх уларыйыыларынан сыаналыыбыт. Бу соругу толорууну хааччыйар "Газпром", "Сахатранснефтегаз" уонна исписэлиистэргэ махтанабын. Саха Сирин өссө элбэх ыалын дьиэтигэр сылаас уонна табыгастаах буолууну аҕалар туһугар үлэбитин салгыахпыт», — диэн Саха Сирин Ил Дархана Айсен Николаев бэлиэтээтэ.
Үлэ туспа хайысхатынан чэпчэтиинэн туһанар гражданнарга туһаайыллыбыт өйөбүл буолла. Быйыл 194 дьиэ кэргэн гааһы туһанар тэрили атыылаһарга уонна таҥарга көрүллэр субсидияны туһанна.
Бэлиэтээн эттэххэ, 2021 сылтан саҕалаан ситимнээх гаас 12 348 дьиэ кэргэҥҥэ кэлбит. Үгүс улуустарга былааннаммыт көрдөрүүлэр ситиһиллэн эрэ буолбакка, аһара барбыттар. Бэлиэ, тыһыынча биэс сүүс ахсааннаах холбооһунан Мэҥэ Хаҥалас улууһун Майа сэлиэнньэтигэр олорор Зоя Афанасьевна Герасимова дьиэтэ буолла — гааһы киниэхэ гаастааһын кэлимсэ бырагырааматын чэрчитинэн киллэрдилэр.
Сонун төрдө уонна хаартыска: Ил Түмэн пресс-сулууспата
