Бүлүтүөҥҥэ тохсус ыҥырыылаах Госдуума быыбарыгар кыттар бэлиитикэ баартыйаларын эмблемалара уонна ааттара атырдьах ыйын 5 күнүгэр ыытыллыбыт жеребьевка бэрээдэгинэн тураллар.
ЦИК бэрэссэдээтэлин солбуйааччы Николай Булаев кэпсээбитинэн, соторутааҕыта бары бэлиитикэ баартыйаларын бэрэстэбиитэллэрэ барылы илии баттаан, бэчээттэрин уурдулар. Бу бүлүтүөнү дойду тас өттүгэр олорор быыбардааччылар ылыахтара. Быйылгыттан кинилэри дойду иһинээҕи уокуруктарга сыһыарбаттар, онон кинилэр уопсай баартыйалар испииһэктэригэр эрэ куоластыахтара. Ити уурааҕынан хамыыһыйа Арассыыйа сиригэр-уотугар 225 быыбардыыр уокурукка баартыйаларга куоластыырга аналлаах барыл бланканы бигэргэттэ. Бүттүүн федеральнай испииһэк бастакы биэһин таһынан, онно бу уокурукка сөп түбэһэр бөлөх үс лиидэрэ ыйыллыбыт.
Хамыыһыйа эрэгийиэннэргэ бүлүтүөннэри бэчээккэ ыытарга ыксаабаттарыгар көрдөспүттэр. «Тиэтэйимэҥ, типографияҕа ыытарга ыксаамаҥ. Бэрэбиэркэлиибит, баҕар, ханнык эмэ көннөрүүлэр баар буолуохтара, бэлэм буолуҥ, баары өссө төгүл бэрэбиэркэлээҥ», — диэтэ ЦИК бэрэссэдээтэлэ Элла Памфилова. Уларытыылары киллэрэргэ бириэмэ баар: сокуонунан бүлүтүөннэри икки түһүмэҕинэн оҥороллор: болдьох иннинээҕи куоластааһыҥҥа анаан быыбар күнүттэн 20 хонук иннинэ уонна атын түбэлтэлэргэ 10 хонук иннинэ.
Хамыыһыйа бэрэссэдээтэлэ быһаарбытынан, Киин быыбардыыр хамыыһыйа логистика уустугунан сибээстээн бүлүтүөн тиэкиһин эрдэ бигэргэппит. Бэлиэтээн эттэххэ, ити биричиинэнэн бүлүтүөн эрдэ бэчээттэммит ахсаанын Москубаттан Абхазияҕа, Соҕуруу Осетияҕа уонна Азербайджаҥҥа учаастактардааҕы хамыыһыйалар эрэ ылыахтара. Атын тас дойдулардааҕы хамыыһыйалар бүлүтүөннэри бэйэлэрэ оҥорон баран, УИК чилиэннэрин илии баттааһыннарынан уонна бэчээттэринэн бигэргэтиэхтэрэ.
Бэнидиэнньиккэ Киин быыбардыыр хамыыһыйа ону тэҥэ тас дойдуларга куоластыыр учаастактары бигэргэттэ. Уопсайа 152 дойдуга 319 учаастак баар. ЦИК чилиэнэ Павел Андреев эппитинэн, бу 2024 сыллааҕы бэрэсидьиэн быыбарыгар холоотоххо, 24 учаастагынан элбэх.
Сонун төрдө: "Российская газета"
Хаартыска: ааптар түһэриитэ
-
0
-
0
-
0
-
0
-
0
-
0
