Общество

Кытайга киирии быраабылалара

Кытайга барыах иннинэ, эрдэттэн бэлэмнэннэххэ, олус табыгастаах дойду эбит. Виза ирдэбилэ суох, ханнык да куоракка QR-куодунан төһө баҕарар төлөөн сылдьыллар.  Alipay сыһыарыыны холбоон, интэриниэтэ суох офлайн-каартаны хачайдааҥ — оччоҕо айан туох да хомолтото суох ааһыаҕа.

Арассыыйа олохтоохторугар Кытайга туристыыр, дьыалабыай көрсүһүүгэ эбэтэр доҕотторго ыалдьыттыы киирэргэ 30 күҥҥэ диэри визата суох (безвизовай) эрэсиим үлэлиир.

Айан иннинэ Arrival Card толоруохха наада. Биһиги барарбыт үс күн иннинэ толорбуппут.  Систиэмэ QR-куоду таһаарыаҕа, ону смартфоҥҥа эбэтэр кумааҕыга бэчээттээн ылыллар.

Көтөөрү туран, Arrival Card толорботох буоллаххытына, Кытайга кэлэн баран, пааспары бэрэбиэркэлэтиэх иннинэ толоруохха сөп. Кыраныыссаны туоруур сирдэргэ Arrival Card толорор сигэлээх QR-куодтар ыйанан тураллар. Ону таһынан, пааспары бэрэбиэркэлээһин иннинэ үлэһиттэр карточканы толорбуккутун-толорботоххутун туһунан ыйыталлар.

Өскөтүн уһун кэмҥэ хаалар, үөрэнэр эбэтэр үлэлиир былааннаах буоллаххытына, виза булгуччулаах. Визаны оҥорторуу быраабылата сырыы сыалыттан тутулуктаах.

Тас дойдуга тахсар пааспаргыт төннөр күҥҥүтүттэн алта ый итэҕэһэ суох болдьоххо дьиҥнээх (действительнай) уонна штамп туруорарга кураанах сирдэрдээх буолуохтаахтар. Визата суох да сырыыга көтөр аал билиэтин, хонор сиргитин бигэргэтэр докумуоннары уонна мэдиссиинискэй страховканы илдьэ сылдьар ордук.

Харчы

Кытайга официальнай валюта — кытай юана (¥). Харчыны кумааҕынан илдьэ барар буоллаххытына, айанныаххыт иннинэ солкуобайгытын юаньҥа уларытар ордук. Маныаха бааннар куурустарын билсэр ордук. Сыана барыларыгар тэҥ буолбатах, күн ахсын уларыйа турар.

Кытайга үксүн сыһыарыыларынан туһанан төлүүллэр. Харчынан эбэтэр каартанан төлүүр өрүү табыгастаах буолбатах, сорох атыылааччыларга ордук харчы эбэтэр баан терминала суох буолар. Кытайга икки сүрүн төлөбүр сыһыарыыта баар.

AliPay — бу төлөбүр систиэмэтэ. Эрэстэрээннэргэ уонна кафеларга сакаас оҥоруохха сөп. Таксыыны ыҥырар сүрүн сыһыарыы эмиэ манна баар.

Сыһыарыыны эмиэ Арассыыйаҕа сылдьан туруорунар ордук, бастаан утаа харчы уган көрөр табыгастаах. Верификацияны ааһарга төлөпүөн нүөмэрин биэрэҕин уонна тус дааннайдары бигэргэтэҕин. Норуоттар икки ардыларынааҕы харчынан көһөрүүнү Сберынан уонна ВТБ баанынан оҥоро сырыттыбыт.

Холобур, Сбер нөҥүө AliPay-га QR-куодунан эбэтэр аккауну кытары сибээстээх төлөпүөн нүөмэринэн харчыны ыытыахха сөп. Биирдэ ыытыы  5000 солк. саҕаланар.

WeChat. Бу соҕотох —  универсальнай сервис буолар. Сыһыарыы нөҥүө кытайдар суруйсаллар, төлөпүөнүнэн кэпсэтэллэр, атыылаһалларын төлүүллэр уонна таксыыны сакаастыыллар. WeChat-ка Арассыыйа нүөмэринэн регистрацияланыахха сөп. Ол эрээри, регистрация кэнниттэн эһигини бигэргэтэр, номнуо WeChat-таах киһи наада: кини эһиги тускутугар верификацияны ааһыахтаах.

Эһиги Кытайга ыйтан кылгас кэмҥэ сылдьар буоллаххытына, WeChat-ы оҥосторгут туһата суох: регистрациялыырга элбэх бириэмэ наада, бигэргэтэр киһи уонна омук каартата ирдэнэр. Төлүүргэ, таксыыны сакаастыырга, кафеларга аһы төлүүргэ AliPay-ы, төһө баҕарар, туһаныахха сөп.

Кытайга «Россельхозбаан» (РСХБ) UnionPay каарталара үлэлииллэр. Каартаттан банкоматтан харчыны устуохха сөп. Улахан бааннар банкоматтарын көрдүүр ордук: Bank of China, ICBC (Industrial and Commercial Bank of China), ABC, CCB. Сорох бөдөҥ супермаркеттарга эмиэ UnionPay каартанан төлүөххэ сөп, ол гынан баран, бу барытыгар тарҕамматах. Омук дойдуларын VISA эбэтэр Mastercard каарталарын ахсааннаах сиргэ ылаллар, ол эрээри, кинилэри төлөбүр сервистэригэр холбуохха сөп.

Сибээс уонна интэриниэт

Кытайга омук сиринээҕи үгүс сыһыарыылар бобуллаллар. Онон айаҥҥа туруох иннинэ төлөпүөҥҥэр үлэлиир VPN туруорар ордук. Тиийэн баран хачайдыыр эбэтэр туруорары бобор систиэмэттэн сылтаан быдан уустук буолуоҕа.

Атын ньыма — eSIM: сорох провайдердар бобууну тумнар кыахтаахтар, оччоҕуна наадалаах бары сыһыарыылар хааччаҕа суох үлэлииллэр.

Каарталар тустарынан эмиэ айаҥҥа туруох иннинэ толкуйданар ордук. Кытайга ордук чопчу навигация иһин олохтоох сыһыарыылары туруоруҥ: Baidu Maps эбэтэр Gaode (Amap) — бу сервистэр билиҥҥи тырааныспар, харгыстар, оптуобус маршруттарын көрдөрөллөр. Интэриниэтэ мөлтөх эбэтэр VPN үлэлээбэт түгэнигэр офлайн-каарталардаахтар.

Тугу илдьэ барабыт

Переходник. Кытайга А көрүҥнээх розеткалар тарҕаммыттар — европейскай биилкэ барсыбат. Хаһан баҕарар универсальнай розеткалаах отель түбэһиэн сөп эрээри, сэрэххэ адаптеры илдьэ сылдьар ордук.

Аптечка. Аһыы ас кыһалҕаны үөскэтиэн сөп, оттон Кытай эмтиэкэлэригэр ханнык эмэ эмтэр суох буолуохтарын сөп, маны сэргэ атын омук эмин иһэртэн туттуммуппут. Маны сэргэ сүрүн эмтэр: ыарыыны намтатар, аллергияны утарсар, пластырь. Арассыыйаҕа сылдьан эмтиэкэттэн ыйыттахха, бэрт үчүгэйдик сүбэлээн-амалаан, талан биэрэллэр.

Салфеткалар. Үксүгэр кытай уопсастыбаннай туалеттарыгар туалетнай кумааҕы суох буолар, онон бэйэҕитин кытта өрүү салфеткалаах сылдьар ордук. Этэн аһардахха, атын да уратытыгар бэлэмнэниҥ: Кытайга муостаҕа турар унитазтар тарҕаммыттар, уопсастыбаннай туалеттар үксүлэригэр чуолаан оннуктар.

Табыгастаах атах таҥаһа. Кытай куораттарыгар бэлиэ сирдэр бэйэ-бэйэлэриттэн ыраах сыталлар. Каартанан көрдөххө, бу сытар курдук эрээри, чаас кэриҥэ хааман тиийэҕин. Элбэхтик хаамыаххыт онон табыгастаах атах таҥаһын кэтиҥ.

Биилкэ. Палочкаларынан аһыырга үөрэммэтэх дьоҥҥо анаан эттэххэ, туристическайа суох сирдэргэ үксүлэригэр европейскай прибордар суохтар. Онон табыгастаах ньуоска, биилкэ илдьэ сылдьар ордук.

Көҥдөй чемодан. Булгуччулаах буолбатах, ол эрээри туһалаах сүбэ: көҥдөй чемоданы илдьэ барыҥ. Харчылаах маҕаһыыннартан аккаастанар уустук — маҕаһыыннары сөбүлээбэт да дьон тулуйбаттар. Манна барытын булуохха сөп. Арассыыйаҕа суох бренд таҥаһын-сабын чэпчэки сыанаҕа, косметиканы, минньигэс астары уонна гаастаах утахтары, эт снэктэри, чэйи, аутентичнай сувенирдары, киэргэллэри о д.а.

Кытай туһунан санааларым

Кытай олохтоохторо туристарга олус эйэҕэстэр, ордук эн омук киһитэ эрээригин, кытай тылынан биир-икки тылы да саҥараргын көрдөхтөрүнэ, олус үөрэллэр.

Alipay — булгуччулаах! Манта суох ханна баҕарар ыарахаттары көрсүөххүн сөп. Олус түргэнник айанныыр пуойастар сөмөлүөттээҕэр быдан табыгастаахтар. Түргэннэр, сыаналара удамыр, олорон айанныырга олус табыгастар.

Элбэхтик туһаммыт сыһыарыыбытынан Trip.com буолар. Кини бары наадалааҕы биир былаһааккаҕа түмэр: көтөр аалга, буойастарга, сынньанар, күүлэйдиир сирдэргэ  билиэттэри атыылаһыы, омук дьонун ылаллара бигэргэммит гостиницалары, аан дойдуга роутингтаах eSIM-ны уонна экскурсиялары. Платформа нууччалыы тыллаах интерфейстээх уонна «МИР» баан каартатынан солкуобайынан төлүүрү өйүүр. Дьон олус элбэҕиттэн ардыгар наһаа илистэҕин, ону таһынан английскай тылы сир аайы өйдөөбөттөр, онон төлөпүөҥҥэр тылбаасчыт хайаан да наада. 

Уопсайынан, Кытай биһиги дьиэ кэргэммитин барытынан умсугутта, сөхтөрдө. Бу -- букатын атын цивилизация, атын эстетика, атын эниэргийэ. Атын дойдуларга сылдьыҥ, дуоһуйа сынньаныҥ!

Галина МАТВЕЕВА бэлэмнээтэ.

Ааптар хаартыскаҕа түһэриилэрэ.