Урбаанньыттар пуорумнара 800-тэн тахса киһини түмтэ. Кыттааччыларга эспиэрдэр кыттыылаах пленарнай сиэссийэлэри, маастар-кылаастары, төгүрүк остуоллары, үөрэх вебинардарын, дьыалабыай оонньуулары ыыттылар, уопсайа 39 былаһаакка үлэлээтэ. Манна федеральнай структуралар, бааннар уонна ситиһиилээх эрэгийиэннээҕи хампаанньалар бэрэстэбиитэллэрэ кытыннылар, 90 эспиэр тыл эттэ. Бырагыраама саҥа саҕалааччыларга уонна уопуттаах урбаанньыттарга, туристарга, ювелирдарга, логистарга уонна финансистарга ананна.
Пленарнай мунньахха Саха Сирин бырабыыталыстыбатын бэрэссэдээтэлин солбуйааччы Анатолий Семёнов өрөспүүбүлүкэҕэ дьоҕус уонна орто урбаан түргэнник сайдан эрэрин болҕомтоҕо ылла : «Мин урбаан пуорумун табылынна дии саныыбын, тоҕо диэтэххэ, кырдьык, өрөспүүбүлүкэбит улуустарыттан олус элбэх биир идэлээхтэрбит кэллилэр. Саха Сиригэр урбаан хамсааһына саҕаланна — биһиэхэ 46 тыһыынча урбаанньыт баар, бу эйгэҕэ 140 тыһыынча киһи үлэлиир. Мин урбаанньыттары сөҕө-махтайа көрөбүн, тоҕо диэтэххэ, уопсайынан даҕаны урбаанынан дьарыктанар чэпчэки буолбатах, оттон Саха Сиригэр — бу муҥутуур тургутуу», — диэн Анатолий Семёнов бэлиэтээтэ.
«Биһиги пуоруммут устуоруйата дириҥ, быйылгы тэрээһин Судаарыстыбаннас күнүгэр, Аан дойдутааҕы туризм күнүгэр, Саха Сиригэр Урбаанньыттар күннэригэр ананна. Отчуоттартан, былааннааһыннартан саҕалаан, туризм эйгэтигэр үлэлиир урбаанньыттар стратегическай сиэссийэлэригэр тиийэ наһаа элбэх сиэссийэ буолла. Бу күннэргэ урбаанньыттар күннэригэр анаан нэһилиэктэргэ уонна куораттарга барыта сүүстэн тахса тэрээһин ыытыллар. Дьокуускайдааҕы пуорумҥа 40-ча курдук тэрээһин буолла, "Кыайыы 50 сыла" успуорт дыбарыаһыгар бизнес-экспо бара турар», — диэн урбааҥҥа, эргиэҥҥэ уонна туризмҥа миниистир Георгий Андреев кэпсээтэ.
Бизнес-экспоны «Мин биисинэһим» киин балаҕан ыйын 25–26 күннэригэр «Кыайыы 50 сыла» успуорт дыбарыаһыгар тэрийдэ. Манна норуот оҥоһуктарыттан, ювелирнай оҥоһуктартан, ас-үөл бородууксуйатыттан саҕалаан, 70-ча кэриҥэ олохтоох табаары оҥорооччу мустубут.
Ааптар хаартыскаҕа түһэриилэрэ
-
0
-
0
-
0
-
0
-
0
-
0
