Ил Түмэн Бэрэссэдээтэлин солбуйааччы, байыаннай сулууспалаахтар, байыаннай дьайыы бэтэрээннэрин дьыалаларыгар, Аҕа дойдуга бэриниилээх буолууга иитиигэ уонна уопсастыбаннай түмсүүлэр боппуруостарыгар сис кэмитиэт бэрэссэдээтэлэ Александр Подголов кылгас кэммэнтээрий биэрдэ:
-- Эһигини Саха Өрөспүүбүлүкэтин Судаарыстыбаннаһын күнүнэн эҕэрдэлиибин! Миэхэ тус бэйэбэр бу күн ураты суолталаах. Мин биһиги өрөспүүбүлүкэбит сувереннай судаарыстыба быһыытынан сайдан, атаҕар турарын харахпынан көрөн туран кыттыбытым. Ил Түмэн иккис ыҥырыылаах мунньаҕар дьокутааттыы сылдьан, биһиги Төрүт Сокуоммутун уонна суверенитетпытын тылынан буолбакка, дьыаланан көмүскээбиппит. Биһиги оччотооҕу кэм эппиэтинэһин өйдүүрбүт уонна кэлэр көлүөнэлэргэ тирэх буолар акылааты түһэрэрбитин билэрбит.
Биһиэхэ хас биирдиибитигэр бу бырааһынньык — судаарыстыбабыт акылаатын уурсубут дьоҥҥо сүгүрүйүү бэлиэтэ. Мин эдэр эрдэхпинэ аан бастаан билбит бас-көс киһим Исидор Барахов этэ. Бу санаатынан бүлгүрүйбэт күүстээх, бириинсиптээх уонна сиэрдээх киһи этэ. Кини ырааҕы өтө көрөрө уонна чаҕылхай аналитическай өйдөөҕө-санаалааҕа. Кини миэхэ судаарыстыбаннай диэйэтэл үтүө холобурунан хаалар. Эппиэтинэһи ыларыттан куттаммат, сирэйгэ кырдьыгы этэр уонна далааһыннаахтык толкуйдуур киһи. Кини пааматынньыга уонна кини туһунан өйдөбүл — биһиги сыаналаммат баайбыт-дуолбут.
Бүгүн, кини пааматынньыгын аттынан ааһан истэхпинэ, маннык дьоннор баар буоланнар, биһиги өрөспүүбүлүкэбит хайдахтаах курдук уустук суолу ааспытын мэлдьи саныыбын. Бүгүн, эдэр дьону көрөн туран, мин кинилэр эмиэ эппиэтинэс сүгэһэрин сүгэргэ бэлэмнэрин көрөбүн. Биһиги өбүгэлэрбит холобурдара кинилэри ыарахаттартан куттаммат уонна хорсуннук иннилэрин диэки барарга көҕүлүөхтээх.
Санатан эттэххэ, Саха Өрөспүүбүлүкэтин судаарыстыбаннаһын төрүттэспит уһулуччулаах бэлитиичэскэй уонна судаарыстыбаннай диэйэтэл, Саха Сирэ социальнай-экэнэмиичэскэй сайдыытыгар кылаатын киллэрсибит Исидор Никифорович Барахов Максим Аммосовтыын, Платон Ойуунускайдыын, Степан Аржаковтыын, Степан Васильевтыын өрөспүүбүлүкэ төрүттэниитигэр сүҥкэн кылаатын киллэрсибитэ.
Кини үрдүкү салалтаҕа эппиэтинэстээх дуоһунастарга үлэлээбитэ: САССР Совнаркомун бэрэссэдээтэлэ (1922—1924), ВКП(б) Саха Сиринээҕи обкомун бастакы сэкирэтээрэ (1926—1928), КК ВКП(б) тыа хаһаайыстыбатыгар Илин Сибиир уонна Уһук Илин салаатын сэбиэдиссэйэ (1933—1938).
Хаартыска: Галина МАТВЕЕВА түһэриилэрэ
-
0
-
0
-
0
-
0
-
0
-
0
