Уопсастыба

Бу күннэргэ Өрөспүүбүлүкэтээҕи медиа-кииҥҥэ «Доҕордоһуу пуойаһа: кыайыыга бииргэ» диэн норуоттар икки ардыларынааҕы култуура-үөрэх бырайыагын түмүктүүргэ анаммыт пресс-кэмпириэнсийэ буолан ааста.

Ил Түмэн Бэрэссэдээтэлин солбуйааччы Александр Подголов тэрээһин үтүө үгэскэ кубулуйбутун уонна бырайыак хас биирдии түһүмэҕин кэнниттэн маннык түмүктүүр тэрээһин хайаан да ыытыллыахтааҕын ыйда. Кини бэлиэтээбитинэн, аахсыйа сүрүн сыалынан-соругунан норуон өрүү кыайыылаах буоларын санатыы буолар. Бырайыак тэрээһиннэрэ ити идиэйэни хас биирдии кыттааччыга тус бэйэтинэн өйдүүрүгэр кыаҕы биэрэр.
Бырайыак туох уратылааҕый? Биһиэхэ норуоппут кыайыылаах норуот буоларын санатар. Маннык санаа, толкуй ордук бырайыак чэрчитинэн ыытыллар аахсыйаларга кытыннахха биирдэ үчүгэйдик киирэр. Киэҥ далааһынннаах буоларыгар болҕомто уурулунна: 12 саастарыттан 80 саастарыгар диэри дьон, өрөспүүбүлүкэ нэһилиэнньэтин араас социальнай араҥатын бэрэстэбиитэллэрэ, кытталлар.
Тэрээһин өссө биир суолталаах уратытынан Саха Сиригэр олорор бары норуоттар култуураларын көрдөрүү буолар. Саха, нуучча уонна эбэҥки үгэс буолбут култуураларын сэргэ, бырайыак кыттыылаахтара дойду атын эрэгийиэннэрин олохтоохторун бүрээттэр, дагестаннар уонна да атын норуоттар култуураларын кытта билсэллэр.
Түмүктүүр тэрээһини СӨ тас сибээскэ уонна норуоттар дьыалаларыгар миниистирин солбуйааччы Татьяна Пяткина салайан ыытта. Бырайыак тула кэпсэтиигэ Александр Подголовы  кытта А.Е. Кулаковскай аатынан Норуоттар доҕордоһууларын дьиэтин дириэктэрэ Антонида Корякина, «Бриллианты Якутии» АНО салайааччыта Зоя Соловьёва уонна Хотугу аҕыйах ахсааннаах төрүт омуктар ассоциацияларын бэрэссэдээтэлэ Күннэй Фёдорова кытыннылар.
«Доҕордоһуу пуойаһа: кыайыыга бииргэ» бырайыак Саха Сирин олохтоохторун сомоҕолуурун, омуктар икки ардыларынааҕы сибээһи сайыннарарын уонна хас биирдии көлүөнэ бэрэстэбиитэллэригэр өрөспүүбүлүкэлэринэн киэн туттууну иитэрин салгыы бөҕөргөтөр аналлаах.

Ил Түмэн пресс-сулууспатыттан.