Быйыл пуорум аан бастакытын эрэгийиэннэр икки ардыларынааҕы ыстаатыһы ылла: Саха Сирин улуустарыттан 100-тэн тахса эдэр исписэлиис, ону тэҥэ Магадан уонна Камчатка уобаластарыттан, Карелияттан уонна Москубаттан бэрэстэбиитэллэр кытыннылар. Үс күн устата технологическай тутулуга суох буолууну, экэниэмикэни, култууралар икки ардыларынааҕы кэпсэтиини, каадырдары уонна социальнай бырайыагы дьүүллэстилэр.
Үөрэхтээһиҥҥэ бииргэ үлэлэһээччинэн «Билии» Арассыыйатааҕы уопсастыба буолла. Панел сиэссийэлэр, лиэксийэлэр, нейроситимҥэ практическай дьарык уонна Саха Сирин инновацияҕа миниистирин кытта көрсүһүү буолла.
Тиһэх күҥҥэ СӨ бырамыысыланнаска миниистирин э.т. Михаил Кириллин, экэниэмикэҕэ миниистир бастакы солбуйааччыта Иван Елисеев уонна Кэлэр көлүөнэлэр тус сыаллаах пуондаларын генеральнай дириэктэрэ Владимир Егоров тыл эттилэр.
«Росмолодёжь.Гранты» куонкурус түмүгүнэн түөрт бырайыак өйөбүлү ылла: Нина Егорова («АлСиб цифровой геохронота»), Анастасия Аммосова («Старт. Марха» пуорум), Вера Дьячковская («Бүлүү куолаһа» агентство) уонна Анна-Мария Дьячковская («Патриот» МЦ медиаволонтердара).
Сүрүн бирииһи Мэҥэ Хаҥалас, Уус Алдан, Ньурба, Бүлүү улуустарыттан, Дьокуускайтан уонна ХИФУ-ттан хамаанда ылла.
Ил Түмэн Бэрэссэдээтэлин солбуйааччы Афанасий Владимиров пуорум тус уонна идэлээх сайдыы оскуолатынан буолбутун бэлиэтээтэ. Ыччат парламенын бэрэссэдээтэлэ Айтал Керемясов: «Эһиги сүрэххитигэр пуорум салҕанар! Бу үс күн устата ылбыт идиэйэлэргит уонна билсиһиилэргит эһигини кытта хаалыахтара. Эһиги ону манна уонна эһиги эрэгийиэннэргитигэр олоххо киллэриэххит», — диэтэ.
Аныгыскы пуорум 2027 сылга ыытыллыаҕа. Тэрийээччилэр — Ил Түмэн, Ыччат парламенын уонна Саха сирин Бырабыыталыстыбата.
Сонун төрдө уонна хаартыска: СӨ бырабыыталыстыбатын МАКС ханаала.
-
0
-
0
-
0
-
0
-
0
-
0
