Ытыктабыллаах Афанасий Семенович. Эйигин үөрүүлээх үбүлүөйүнэн итиитик-истиҥник эҕэрдэлээн туран, чэгиэн-чэбдик доруобуйаны, үлэҕэр ситиһиилэри, дьиэ кэргэҥҥэ этэҥҥэ буолууну баҕарабыт.
Истиҥ эҕэрдэни кытары «Ил Түмэн» издательскай дьиэ кэлэктиибэ
Ыспыраапка:
Афанасий Семенович Владимиров 1965 сыллаахха тохсунньу 25 күнүгэр Хаҥалас оройуонун Үөһээ Бэстээх бөһүөлэгэр күн сирин көрбүтэ. Челябинскайдааҕы судаарыстыбаннай физкултуура институтун ситиһиилээхтик үөрэнэн бүтэриэҕиттэн, тренертэн саҕалаан иитэр-үөрэтэр эйгэҕэ, салайар үлэ бары түһүмэхтэринэн үтүө суобастаахтык үлэлээбитэ. Төрөөбүт улууһугар баһылыктаабыта, үөрэх уонна ыччат бэлиитикэтин министиэристибэлэрин, Ил Дархан уонна Бырабыыталыстыба дьаһалтатыгар олохтоох салайыныы боппуруостарын департаменын, Ил Дархан уонна Бырабыыталыстыба дьаһалтатын салайбыта.
Ааспыт 2024 сылга Афанасий Семенович салайар Ил Түмэн судаарыстыба тутулугар уонна сокуону оҥорууга сис кэмитиэтэ бэрт таһаарыылаахтык үлэлээтэ. Барыта 24 сокуон барыла киирэн көрүллүбүтүттэн, 20 сокуон барыла бүтэһиктээх ааҕыыга ылылыннылар.
Олортон биирдэстэрэ – «Саха Өрөспүүбүлүкэтигэр босхо юридическай көмөнү оҥорор туһунан» сокуон 4.1-с уонна 8-с ыстатыйаларыгар уларытыылары киллэрэр туһунан» 542-6 №-дээх сокуон барыла буолар. 2011 сыллаахха ылыллыбыт «Арассыыйа Федерациятыгар босхо юридическай көмөнү оҥорор туһунан» федеральнай сокуон чэрчитинэн, босхо юридическай көмөнү ылар гражданнар кэрискэлэрэ кэҥэтиллэн биэрдэ. Ол курдук, бу кэрискэҕэ 2022 сыл олунньу 22 күнүттэн Донецкай, Луганскай өрөспүүбүлүкэлэргэ, Украина сиригэр-уотугар анал байыаннай дьайыыга кыттыбыт, кытта сылдьар байыаннай сулууспалаахтар, Росгвардия байыастара, быстах хомуурунан ыҥырыллыбыт дьоннор, полиция үлэһиттэрэ уонна командировканан тиийэн үлэлээбит, үлэлии сылдьар араас идэлээх исписэлиистэр итиэннэ кинилэр дьиэ кэргэттэрэ (төрөппүттэрэ, ойохторо, оҕолоро уонна кинилэр иитимньилэригэр сылдьар дьоннор) киллэрилиннилэр.
-
5
-
0
-
0
-
0
-
0
-
0
