Общество

Арассыыйа таһымыгар билиниллибит испэктээк

Тыйаатыр анал байыаннай дьайыы (АБДь) тиэмэтигэр анаммыт улахан туоруоруутун көрөөччү дьүүлүгэр таһаарар. Манна даҕатан эттэххэ, Үүнэр көлүөнэ тыйаатыра бүтэһик сылларга патриотическай иитиигэ ураты улахан болҕомто уурар, маныаха тустаах испэктээктэри киэҥ араҥаҕа таһаарар.

“Нить надежды” («Эрэл ситимэ») —тыйаатыр уус-уран салайааччыта, Арассыыйа култууратын үтүөлээх үлэһитэ Алексей Прокопьевич Павлов туруоруута. Кини бырайыага «Русские сезоны» куонкуруска кыайан, Арассыыйа Култууратын министиэристибэтин Гранын ылбыта — бу биһиги өрөспүүбүлүкэбитигэр улахан чиэс.

Премьера Марк Жирков аатынан Дьокуускайдааҕы муусука кэллиэһин дьиэтигэр киэһэ 5 чаастан буолуоҕа.

Сүрүн санаалар уонна дьоруойдар

Пресс-кэмпириэнсийэҕэ кыттыбыт дьон бары биир сүрүн санаанан салайтардылар: бу испэктээк — сэрии уотугар сылдьар буойуттарга, кинилэр дьиэ кэргэттэригэр өйөбүл, духуобунай тирэх буолар аналлаах.

СӨ Култууратын уонна духуобунай сайдыытын миниистирин солбуйааччы Ирина Кобзева бу бырайыак судаарыстыба таһымыгар суолталааҕын бэлиэтээтэ: «Биһиги дьоммут-сэргэбит Ийэ дойдуга бэриниилээхтэрин көрдөрөр кэмнэригэр, тыйаатыр эмиэ туора турбата. Бу — норуот сомоҕолоһуутун тыыннаах холобура».

Испэктээк ааптара, суруйааччы Степан Сивцев -- Хамалга бу туруоруу кини сүрэҕин бааһа буоларын эттэ. Кини, АБДь волонтера буолан, инники кирбиигэ сылдьар уолаттары кытары бииргэ сылдьыбыт, кинилэр кэпсээннэрин истибит буолан, сыанаҕа дьиҥнээх олох киирэрин ситистэ.

Сүрүн оруолу толорооччу, СӨ үтүөлээх артыыһа Мария Данилова ийэ абын-сатын, эрэйин хайдахтаах курдук дириҥник арыйбытын көрөөччү долгуйа көрүөҕэ. Оҕото тыыннааҕар итэҕэйэн, дьону түмэн, үтүө көмөһүттэр хамсааһыннара тэриллибитин көрдөрүө. Кини: «Бу оруолга киирэрбэр, хас биирдии саха ийэтин хараҕын уутун, кини тулуурун эппинэн-хааммынан биллим», — диэтэ.

Инники кирбиигэ — дьиҥнээх дьоруойдар

Испэктээк дьиҥ олохтон ылыллыбыт түгэннэргэ олоҕурарын туоһулаан пресс-кэмпэриэнсийэҕэ АБДь кыттыылаахтара таҕыстылар. Лаврентий Степанов уонна Михаил Ефремов диэн эдэркээн байыастар, инники кирбиигэ сылдьан, ыарахаттары көрсүбүттэрин, ол эрээри санааларын түһэрбэтэхтэрин туһунан кэпсээтилэр. Кинилэр тыйаатыр кэлэктиибигэр махтанан, бу испэктээк эдэр буойуттарга күүһү-уоҕу эбиэҕэ диэн эрэнэллэрин биллэрдилэр.

Ийэ хараҕын уута

Пресс-кэмпириэнсийэ саамай долгутуулаах чааһынан Светлана Диодорова-Лаврентьева — кыргыһыы хонуутугар дьоруойдуу охтубут байыас ийэтин — этиитэ буолла. Кини оҕотун доҕотторун кытта кэлэн хараҕын уутун кистээбэккэ, оҕотун ахтылҕанын туһунан эттэ. «Хас биирдии инники кирбииттэн тахсыбыт байыаска ийэ дойдутуттан кэлбит кыра да баһыылка, амтаннаах ас ураты улахан суолталаах. Кинилэргэ көмө оҥорор үтүө көмөһүттэргэ аналлах испэктээк оруола билиҥҥи кэмҥэ ураты сыаналах», — диэн кини иэйэн-куойан туран эттэ.

Туруорааччы бөлөх

Испэктээк уус-уран таһыма үрдүгүн туруорааччы-худуоһунньук Прасковья Павлова уонна муусуканан киэргэппит Павел Неустроев мэктиэлииллэр. Сахалыы тыыннаах, куттаах көстүүмнэр, дьүһүйүү муусуката көрөөччү сүрэҕин кылын таарыйыаҕа. Испэктээк нууччалыы тылынан туруорулунна, ол эрээри сахалыы тылбаастаах туруоруулары улуустарынан сылдьан көрдөрөр былаан баар.

Тыйаатыр — дьон санаатын көтөҕөр күүс

Пресс-кэмпириэнсийэни түмүктүүрүгэр, Алексей Прокопьевич Павлов маннык диэтэ:

«Биһиги сэрии туһунан киинэҕэ курдук өлөрсүүнү-уһууну көрдөрө сатаабаппыт. Биһиги сүрүн сорукпут — киһи олоҕун сыаналааһын, Ийэ дойдуга таптал, доҕордоһуу диэн тугуй диэн көрдөрүү. "Эрэл ситимэ" — бу уолаттарбыт, кинилэр төрөппүттэрин, чугас дьонун сүрэхтэригэр баар эрэл кыыма. Ол кыымы биһиги тыйаатырбыт улаатыннаран, көрөөччүгэ тиэрдэр соруктаах. Кинигэттэн ураты киллэрэн, туруоруу сүрүн дьоруоуйа тыыннаах ийэтигэр эргиллэн кэлиэ. Бу биһиги дьоммутугар-сэргэбитигэр эрэли киллэриибит, кыайыыга эрэлбит», - диэн эттэ.

Саха тыйаатыра көрөөччүлэрин сэтинньи 20 күнүгэр, киэһэ 5 чаастан, Марк Жирков аатынан Муусука кэллиэһигэр күүтэр. Бу испэктээги көрөн баран, ким даҕаны хараҕын уутун кыаммата биллэр. Бу — биһиги барыбыт сүрэхпит бааһа. Онон сылдьыҥ, сэргээҥ, көрүҥ!

Галина МАТВЕЕВА

Ааптар хаартыскаҕа түһэриилэрэ.