Өрөспүүбүлүкэ олохтоохторуттан барыта 1,5 мөл. солк. тахса үп хомуллубута. Харчыны хомуйууну бастакынан Өлүөхүмэ, Мииринэй, Алдан оройуоннарын олохтоохторо өйөөбүттэрэ. Бөдөҥ суумалары «Биир ньыгыл Россия» партия чилиэннэрэ Александр Ноговицын, Евгения Михайлова, Елена Голомарева, Михаил Гуляев киллэрбиттэрэ.
Оччолорго скульптураны туруорууга үс миэстэ сөптөөх буолуоҕа ыйыллыбыта – ДСК оройуонугар байыаннай чааска, аармыйаҕа ыҥырар пуун аттыгар уонна "Дохсун" спорт комплексын таһыгар.
Кэнники пааматынньыгы туруоруу миэстэтин дьүүллэһии салҕаммыта, араас сир учаастактара көрүллүбүттэрэ. Тиһэҕэр, быйыл, 2020 сылга, Улуу Кыайыы 75 сылын бэлиэтээһини көрсө өйдөбүнньүгү Дьокуускай куоракка Өктөөп 50 сыла аатынан айан суолугар оҥоһуллар Кыайыы Пааркатыгар туруорарга быһаарыы ылыллыбыта.Скульптура Кыайыы Паарката аһыллар күнүгэр – балаҕан ыйыгар диэри туруоруллуохтаах.
Муус устар 17 күнүгэр бастыҥ бырайыакка куонкурус биллэриллибитэ. Кыайыылаахтарынан скульптор Николай Чоччасов уонна архитектор Марина Рожина ааҕыллыбыттара.
“Бу улуу киһи туһунан өйдөбүлү үйэлэргэ хаалларар туһугар скульптура боруонсаттан кутуллуоҕа. Болуоссакка стела уонна сцена ортотугар «сүппэтин» курдук, олоххо баар кээмэйинэн оҥорууттан туттуннубут. Сыанатыгар сири-уоту тупсарыы суумата киллэрилиннэ”, -- диэн бэлиэтээтэ Николай Чоччасов.
Бырайыак ааптара этэринэн, пааматынньык тута харахха быраҕылларын курдук, ити сиргэ-уокка соҕуруу өттүгэр туруоруллуоҕа.
Иван Кульбертиновка пааматынньыгы туруорууга анаан норуот дьокутааттара өрөспүүбүлүкэ быйылгы сыллааҕы бүддьүөтүгэр эбии 8,2 мөл. солк. көрбүттэрэ. Ити быһаарыыны “Биир ньыгыл Россия” партия Саха сиригэр үлэлиир регионнааҕы салаатын сэкирэтээрэ, өрөспүүбүлүкэ баһылыга Айсен Николаев өйөөбүтэ.
“Биһиэхэ барыбытыгар Иван Николаевич олоҕо тулуурдаах буолуу уонна эр санаа, бэйэ норуотугар, өрөспүүбүлүкэҕэ бэриниилээх буолуу уонна муҥура суох таптал холобурунан көстөр. Биһиги дойдубут чэчирии сайдарын туһугар үгүһү оҥорбут дьону өйдүөх-саныах уонна кинилэр ааттарын ытыктыах тустаахпыт”, -- диэн бэлиэтээтэ Елена Голомарева.
-
0
-
0
-
0
-
0
-
0
-
0
