Кыайыы былааҕа 1945 с. Берлиҥҥэ Рейхстаг үрдүгэр тэлибирии кытаран, ССРС дойдутун уонна бүтүн Европаны фашизм батталыттан, өлөрөр-өһөрөр сэриититтэн босхолообутун, ил-эйэ олоҕу киһи-аймахха бэлэхтээбитин туоһулаабыта. Кып-кыһыл былаахха Сэбиэскэй Сойуус бэлиэтэ: сиэрпэ уонна өтүйэ, сулус көстөр. Бу знамяны 150-ус дивизия саллааттара Алексей Берест, Михаил Егоров уонна Мелитон Кантария көтөхпүттэрэ.
Байыаннай фотокэрэспэдьиэн Евгений Халдей саллааттар Кыайыы знамятын Рейхстаг үрдүгэр күөрэппиттэрин хаартыскаҕа түһэрбитин прессаҕа мөлүйүөнүнэн экземплярынан тарҕаппыттара. Ол кэмтэн ыла 80-ча сыл ааста даҕаны, хаартыска сыаннаһын сүтэрбэт.
Билигин даҕаны Анал байыаннай дьайыыга биһиги буойуттарбыт киирсиилээх кирбиини, бөһүөлэги, куораты ыллахтарына Кыайыы знамятын күөрэччи ыйыыллар. Маннык үтүө үгэс Аҕа дойдуну көмүскүүр сэрии саҕаттан кэлбитэ. Ис хоһооно урут даҕаны, билигин даҕаны, кыайыыны ситиһиэхпит диэн.
Анал байыаннай дьайыыга
2022 с. олунньу 24 күнүгэр Анал байыаннай дьайыы саҕаламмыта. Ол сүрүн сыала-соруга - Донецкай норуодунай өрөспүүбүлүкэни уонна Луганскай норуодунай өрөспүүбүлүкэни көмүскээн, Украинаны неонацистар түмсүүлэриттэн, сэрии сэбиттэн босхолооһун, итиэннэ Арассыыйа арҕаа кыраныыссатыгар, доҕордуу Белоруссия таһыгар байыаннай кутталы суох оҥоруу.
Байыаннай дьайыы бастакы күннэриттэн Сахабыт Сириттэн баҕа өттүнэн дойдуларын көмүскүү барар этэрээттэр туруммуттара, тэрилтэлэр үбү-харчыны, сылаас таҥаһы-сабы, аһы-үөлү хомуйан ыыппыттара. Массыынаҕа, тиэхиньикэҕэ, туттар тэрилгэ тиийэ билигин даҕаны көмө быһыытынан быыстала суох тиэрдиллэ турар.
Саха саллааттара бэйэлэрин бэрээдэктээх, булугас өйдөөх, бэргэн ытааччы, ыарахантан толлубат, ас суох да кэмигэр туох баарынан бултаан, халлаан анныгар кулуһун уотугар буһаран, дьоннорун аһатан, этэрээккэ ытыктабылы ылар хорсун буойуттар быһыытынан көрдөрдүлэр.
Күн бүгүн Анал байыаннай дьайыыга баҕа өттүнэн, хантарааҕынан, Росгвардия буойуттара уонна 2022 с. алтынньытыттан мобилизованнайдар киирсэллэр, Кыайыы туһугар дьоһун кылааттарын киллэрэллэр.
Саха түмэлин устуоруйаҕа салаатын үлэһитэ Валерий Корнилов Анал байыаннай дьайыы дьоруойдарын, кыттыылаахтарын туһунан кэпсээтэ. Быыстапкаҕа Ил Дархан диэн позывной ааттаах Анал байыаннай дьайыы кыттыылааҕын буулдьа оскуолага тоҕо көтөн, көхсө тэстибит куурката турар. Кини «Барс» бөлөх иһинэн дойдутун көмүскүү барбыта.
«Уолаттар өстөөх уотуттан ангар иһигэр киирэн саспыттара, манна тыын ылан сынньана түһээри ыарахан ыйааһыннаах бронежилеттарын устубуттара. Ити кэмҥэ минометнай миинэ навесной траекториянан ангаар кырыыһатынан көтөн киирэн, дэлби тэбэр. Ол оскуолага буойун көхсүн эчэтэр, икки хос кэтэ сылдьар куурката барыта кыа хаан буолбута.
Табаарыстара бастакы көмөнү оҥорон, госпиталга ыыппыттара, маннык эчэйии кэнниттэн айыыһыта харыстаан, тыыннаах хаалбытыгар махтал. Ити кэнниттэн кини Анал байыаннай дьайыыга төннүбэтэҕэ», — диэн этэр Валерий Анатольевич. Уоту ортотунан ааспыт буойун тайахтаах кэлэн, хаан-билик буолбут таҥаһын бырахпакка, ол кэм кэрэһитин мусуойга туттарбыта өйдөбүнньүк буолан турар.
Арассыыйа Дьоруойа Дмитрий Егоров
Аҕа дойдутун чиэстээхтик көмүскүү сылдьан кыргыһыы хонуутугар сырдык тыына быстыбыт саллаат кааската уонна бронежилета өстүөкүлэ бүрүөһүннээх битириинэ нөҥүө көстөр. «Бронежилет араас оҥоһуулаах, күн аайы ыарахан ыйааһыннааҕы сүгэ сырыттахха, хайа да киһи көхсүтэ кыайан тулуйбат. Халыҥы, ыараханы үксүн штурмовой эпэрээссийэлэргэ эрэ кэтэллэр”, — диэн быһаарар Валерий Корнилов.
Бронежилеты Сунтаар диэн позывнойдаах Арассыыйа Дьоруойа Дмитрий Егоров кэтэ сылдьыбыта. Кини 1975 с. Сунтаар Тойбохой нэһилиэгэр күн сирин көрбүтэ, аармыйаҕа 1993-1994 сс. Читинскэй уобалас Борзя куоратыгар тааҥка этэрээтигэр сулууспалаабыта.
Аармыйаттан кэлэн баран Мииринэйгэ баһаары умуруорар сулууспаҕа, «АЛРОСА» хампаанньаҕа суоппарынан, слесарынан үлэлээбитэ, 2020 с. тутуу матырыйаалынан дьарыктаммыта. Оҕо сааһыттан успуордунан дьарыктанарын, бултуурун сөбүлүүрэ, иллэҥ кэмигэр хомуһу оҥороро.
Дмитрий Егоров Анал байыаннай дьайыыга баҕа өттүнэн барбыта. Тиихэй акыйааннааҕы флот муоратааҕы пехотатын 155-ис гвардейскай биригээдэтин ытар батальонун бэргэн ытааччыта этэ. Кини 2023 с. «Байыаннай түмсүүнү бөҕөргөтүүгэ» мэтээлинэн наҕараадаламмыта.
2023 с. балаҕан ыйын 7 күнүгэр Новомайорскай сэлиэнньэ арҕаа кытыытыгар «Тэтиҥ» тирэх пууну штурмалаан ылыыга бастакынан ойон киирэн, өстөөх түөрт саллаатын охторбута. Утарылаһааччылара саһа сыппыт сирдэрин хаалларан куота турбута. Тирэх пууну ити курдук биир даҕаны сүтүгэ суох ылбыттара уонна сүрүн бөлөх кэлиэр диэри өстөөҕү киллэрбэтэхтэрэ.
Икки күнүнэн балаҕан ыйын 9-гар Дмитрий Егоров тирэх пууҥҥа өстөөҕү чугаһаппат туһугар бэйэтин харыстаммакка киирсэн, сырдык тыынын толук уурбута. Дойду Бэрэсидьиэнин Владимир Путин ол сыл алтынньы 9 күнүгэр тахсыбыт 763 №-дээх ыйааҕынан, байыаннай соругу толорууга эр санаатын, дьоруойдуу хорсун быһыытын иһин Дмитрий Николаевич Егоровка Арассыыйа Федерациятын Дьоруойун аатын иҥэрбиттэрэ. Санатан эттэххэ, күн бүгүн өрөспүүбүлүкэ Анал байыаннай дьайыыга уонтан тахса дьоруойдаах.
Ааптар хаартыскаҕа түһэриитэ.
-
2
-
1
-
0
-
0
-
0
-
0
