Түмэл научнай-чинчийэр үлэтин сүрүннүүр сэбиэдиссэй Прасковья Семенова кэпсииринэн, бу суорҕаны Яковлевтар дьиэ кэргэттэрэ туттарбыттар. Кинилэр аҕа баһылыктара Ян Алексеевич Яковлев Ньурба улууһун уонна Октябрьскай нэһилиэгин Бочуоттаах олохтооҕо, Саха Өрөспүүбүлүкэтин үөрэҕин туйгуна, тыа хаһаайыстыбатын бочуоттаах бэтэрээнэ, ытык старейшината. Кини 7 сааһыттан сайын аайы «Кыым» холкуоска үлэлээн, оҕо сааһыттан ыарахан үлэҕэ эриллэн, ууну-уоту ортотунан ааспыта.
Аҕата Алексей Никифорович Яковлев 1942 сыллаахха сэриигэ ыҥырыллыбыта, уонна эһиилигэр Сталинград кырыктаах кыргыһыытыгар сырдык тыынын толук уурбута, «За оборону Сталинграда» мэтээлинэн наҕараадаламмыта. Тулаайах хаалбыт 10 саастаах уолу эһэтэ Никифор Яковлев иитэ ылбыта. Никифор кыра уола Петя эмиэ сэриигэ ыҥырыллан барбыт эбит, ийэтэ бу суорҕаны кыра уолугар анаан тикпитэ эрээри, сэрии бүтүө аҕыйах хонук хаалбытын кэннэ муус устар 27 күнүгэр Чехословакияҕа кыргыһыы хонуутугар охтубута. Ол иһин эбэтэ суорҕаны ситэри тигэн баран сиэнигэр Яҥҥа туттарбыт. Ян дьиэ кэргэнэ бу сылларга диэри түүлээх сылаас суорҕаны харыстаан, уура сылдьыбыттара, арай 2021 сыл сайыныгар сүбэлэһэн баран, түмэлгэ туттарарга санаммыттара.
Ийэ барахсан бу суорҕаны уолум сэриигэ сылдьан, сиргэ сытан тоҥмотун-хаппатын, тымныйан ыалдьыбатын диэн илиитин сылааһын иҥэрэн тиктэҕэ. Ону Яковлевтар дьиэ кэргэттэрэ харысхал курдук харыстаан, эргэрдэ диэн быраҕан кэбиспэккэ илдьэ сырыттахтара.
Хаартыска Ньурба түмэлин пуондатыттан.
-
1
-
0
-
0
-
0
-
0
-
0
