1942 сыл сэтинньи ыйга Ленинградскай уобаластан өстөөҕү кыйдааһын элбэх сүтүктээх сэриилэригэр кыттыбыта. Тит Белолюбскай куттаҕаһа суох хорсун буолуу холобурун көрдөрөн, саллаат-бөлөмүөччүк быһыытынан бэйэтин чааһыгар хайҕанара.
Күннэр-дыллар ааһан испиттэрэ. Тит Белолюбскай II-ис Прибалтийскай фронт сэрииһиттэрин кытта бииргэ Литва, Латвия хонууларыгар кыргыспыта. Манна көрдөрбүт уһулуччулаах хорсун быһыытын иһин, “Кыһыл Сулус” уордьанынан наҕараадаламмыта. Ол туһунан байыаннай чаас хамандыыра, полковник Макаренков бу курдук суруйар:
“Кыһыл армеец, саха уола Тит Белолюбскай командование биэрбит сорудахтарын мэлдьитин туйгуннук толорор. Кини биһиэхэ эрэли, күүһү биэрэр курдук, сэрииһиттэр бары хайҕыыллар, туйгун саха диэн ааттыыллар. Ол да иһин, Тит Иванович Бырабыыталыстыба үрдүкү наҕараадатын «Кыһыл Сулус» уордьаны ылар дьоллонно».
Тит Иванович аармыйаҕа ыҥырыллыбыт бириэмэтигэр бэс ыйыгар төрөөбүт дойдутугар, талыы талба Тааттаҕа эргиллэн кэлэн, биир дойдулаахтара үөрэ-көтө, уруйдуу-айхаллыы көрсүбүттэрэ диэн В. Матаннанов «Коммунист» хаһыакка 1945 сыл бэс ыйын 6 күнүгэр суруйбут ыстатыйата саһарбыт былыргы хаһыаттары кытта Таатта түмэлигэр өйдөбүнньүк буолан турар.
Мария ТУЛАСЫНОВА, Ытык Күөллээҕи Таатта түмэлин ыстаарсай научнай үлэһитэ.
Хаартысканы ааптар хааччыйда.
-
0
-
0
-
0
-
0
-
0
-
0
