Политика

Саха Сирин уһулуччулаах судаарыстыбаннай диэйэтэлэ Максим Кирович Аммосов пааматынньыгар сибэкки ууруутугар СӨ Бырабыыталыстыбатын бэрэссэдээтэлэ Андрей Тарасенко сырытта.  “Манна элбэх эдэр эрчимнээх киһи мустубута үөрдэр. Эһиги -- биһиги инники кэскилбит буолаҕыт”, -- диэн устудьуоннары эҕэрдэлээтэ.

                СӨ Ил Түмэнин бүддьүөккэ, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев:

                - Убаастабыллаах куорат олохтоохторо, ыалдьыттара, эдэр ыччат! Эһигини Судаарыстыбаннай мунньах аатыттан итиитик-истиҥник өрөгөйдөөх 100 сыллаах үбүлүөйүнэн эҕэрдэлиибин! Биһиги бары дьоллоох дьоммут. Төһөлөөх элбэх киһи аптаныамыйа 100 сааһыгар тиийбит киһи диэн кэтэһэ санаабыта эбитэ буолуой? Биһиги тиийэн кэллибит, биһиги баарбыт. Бэйэбит дьоммутун санаан-ахтан ааһабыт. Өрөспүүбүлүкэ араас бириэмэни ааспыта – гражданскай сэриини, репрессия кэмнэрин, Аҕа дойду Улуу сэриитин, улугуруу, уларытыы кэмнэрин. Билигин биһиги эмиэ кытаанах балаһыанньаҕа сылдьабыт. Ол иһин биһиги билигин сомоҕолоһуохпутун наада. Оччоҕо барытын кыайар кыахтаныахпыт. Онон Өрөспүүбүлүкэ күнүнэн өссө төгүл эҕэрдэлиибин! Улуу салайааччыларбытыгар, бастакы дьоммутугар сахалыы уруй-айхал!

                «Нам улууһа» муниципальнай тэриллии баһылыга Юрий Слепцов:

                - Күндү биир дойдулаахтарым! Нам улууһун дьонун-сэргэтин аатыттан бу улуу сабыытыйанан, өрөспүүбүлүкэбит аптаныамыйаны ылбыта 100 сылынан уонна уһулуччулаах судаарыстыбаннай-бэлитиичэскэй диэйэтэл Максим Аммосов төрөөбүтэ 125 сылын бэлиэтиир сылбытынан итиитик-истиҥник эҕэрдэлиибин! 100 сыл диэн дойдуга кыра курдук көстөр. Ол эрэн, бу 100 сыл иһигэр элбэх араас буолан ааста. Оттон биһиэхэ билигин сайдыы суола аһаҕас. Оскуолалар тутуллаллар, араас инфраструктура, гаас, уот оҥоһуллар. Өрөспүүбүлүкэ сайдыы суолугар турунан эрэллээхтик иннин диэки баран иһэр. Барыгытын бырааһынньыгынан эҕэрдэлиибин! Ураа, табаарыстар!

СӨ Ил Түмэнин бэрэссэдээтэлэ Алексей Еремеев:

- Күндү сахам дьоно! Саха Өрөспүүбүлүкэтин Ил Түмэнин аатыттан Саха аптаныамыйалаах Сэбиэскэй Социалистическай Өрөспүүбүлүкэтэ тэриллибитэ 100 сылынан итиитик-истиҥник эҕэрдэлиибин! Сүүс сыл анараа өттүгэр М.К. Аммосов, П.А. Ойуунускай, И.Н. Барахов, С.М. Аржаков уонна С.В. Васильев Саха Сирин Арассыыйа састаабыгар инники дьылҕатын социальнай-экэнэмиичэскэй, култуура өттүнэн сайдыылаах эрэгийиэн курдук көрбүттэрэ. Дойдубут дьылҕата быһаарыллар кэмнэригэр ытыктабыллаах гуманистар, интэлигиэнсийэ чаҕылхай бэрэстэбиитэллэрин тылыгар мэлдьи болҕомтобутун уурабыт. ХХ үйэ саҕаланыытыгар биһиги улуу өйдөөх-санаалаах киһибит Өксөкүлээх Өлөксөй «Ойуун түүлэ» уонна «Саха интэлигиэнсийэтигэр суруга» диэн айымньыларыгар Саха Сирин, Арассыыйа уонна аан дойду кэскилин түстээбитэ. Норуодунай суруйааччы Суорун Омоллоон: «Өрөспүүбүлүкэ биир сүрүн соругунан Саха Сирин уонна Арассыыйа историческай дьылҕаларын бөҕөргөтүү буолар», -- диэн хаста да хатыылаан эппитэ. Бүгүн Саха АССР Арассыыйа Федерациятын тэҥ бырааптаах субъегын быһыытынан тэриллибитэ 100 сылын көрсөр. Өрөспүүбүлүкэ этэҥҥэ буоларыгар хорсун үлэҕит иһин махтанабын. Эһиэхэ уонна эһиги чугас дьоҥҥутугар доруобуйаны, сарсыҥҥы күҥҥүтүгэр эрэли, этэҥҥэ буолууну уонна дьолу баҕарабын!

                «Дьокуускай куорат» куораттааҕы уокурук баһылыгын бастакы солбуйааччы Алексей Корнилов:

                - Саха Сирин араас омуктара бииргэ түмсэн, Сэбиэскэй Сойуус 70 сыллаах былааһын кэмигэр дойдубутун сайыннарарга үлэлэспиттэрэ. Өрөспүүбүлүкэ нэһилиэнньэтин олоҕо тупсубута, үөрэҕин, култууратын таһыма үрдээбитэ. Тылбытын, култуурабытын харыстыыр кыах баар буолбута. Оттон билигин куораппыт улаханнык уларыйа турар. Суол оҥоһуллар, оскуола, дьыссаат тутуллар. Өбүгэлэрбит биһиэхэ маннык олоҕу баҕарар этилэр, ол баҕалара туолла. Онон, күндү биир дойдулаахтарым, бырааһынньыгынан эҕэрдэ буолуохтун!

                М.К. Аммосов аатынан ХИФУ ректора,Ил Түмэн дьокутаата Анатолий Николаев:

                - М.К. Аммосов аатын сүгэр Хотугулуу-Илиҥҥи федеральнай университет аатыттан өрөспүүбүлүкэбит 100 сылынан эҕэрдэлиибин! Максим Кирович эппитэ: “Аптаныамыйалаах өрөспүүбүлүкэ тэрилиннэҕинэ, дьадаҥы, им-балай олох уурайан, кэрэ кэскилгэ үктэниэхпит”. Билигин университеппыт сайдарын көрөн туран, Максим Аммосов сөпкө да эппит дии саныыбын. Бу сырдык күҥҥэ барыбытын бырааһынньыгынан эҕэрдэлиибин!

2022 сыл кулун тутар 31 күнүнээҕи М.К. Аммосов аатынан ХИФУ учуонай сэбиэтин уурааҕынан туйгун үөрэх, научнай-чинчийэр үлэҕэ ситиһии, олоххо көхтөөх позиция, университет  үтүө аатын сайыннарыы уонна үрдэтии иһин Максим Аммосов аатынан истипиэндьийэ ананна. Истипиэндьийэни туттулар: Никита Федотов, юридическай факультет 2 кууруһун магистрана, Гаврил Старостин, Хотугулуу-Илиҥҥи омуктар тылларын, култууратын институтун 4 кууруһун устудьуона, Александр Атаков, инфраструктурнай технологиялар колледжын 3 кууруһун устудьуона.