Айсен Сергеевич сыана улаханнык үрдүө суоҕа, СР Правительствотын өттүттэн хонтуруол баарын таһынан, аһылыгы, табаары аҕалыынан дьарыктанар предпринимателлэргэ чэпчэтиилээх кредиттэр бэриллиэхтэрэ диэн тоһоҕолоон бэлиэтээтэ. Тыа хаһаайыстыбатын сайыннарыыга оҕуруот аһын ыһыытын салаатыгар, сибиинньэ, сылгы, ынах, таба иитиитигэр анал программаларынан үбүлээһиннэр көрүллэн үлэлии тураллар. Кэтэх ыал ыанар ынаҕын төбөтүгэр бэриллэр 35 тыһыынча салгыы өйөнөрүн таһынан, кэтэх ыаллар үүт туттаралларыгар республика бюджетыттан биир киилэ туттарар үүттэригэр 10 солкуобай бэриллиэҕэ, ону таһынан үүт тутар тэрилтэлэр 10 солкуобай эбэн, 20 солкуобайга тутуохтара. Маны таһынан сорох улуустар бэйэлэрин бюджеттарыттан 10 солкуобайы биэрэн, биир киилэ үүтү 30 солкуобайга тутан, ынахтаах ыалы өйүүр үчүгэй холобурдар баар буолан эрэллэр.
Айсен Сергеевич этиитинэн, миэстэтигэр биһиги олохтоох бородууксуйа элбиирин туһугар үлэни-хамнаһы тэрийэн ыытыахтаахпыт. Быйылгы кыстык ыараханнык ааһан эрэрин, ото тиийбэт улуустарга атын уобаластан от таһар техника суолун ороскуотугар 1 миллиард солк. курдук үбүлээһин көрүллүбүтүн бэлиэтээтэ.
Дьокуускайдааҕы көтөр фабриката Россия Уһук Илин уокуругар племенной хаһаайыстыба буоларын ситиһэн, федеральнай үбүлээһининэн салгыы сайдыаҕа.
Сөмөлүөтүнэн көтөргө субсидиялаах билиэттэр баар буолуохтара, кинилэр элбииллэрин туһугар үлэлэһиэхпит. Онтон салгыы Айсен Сергеевич республика олохтоохторугар социальнай объектары тутуу салҕанан барыаҕа, Аммаҕа экология өттүнэн харыстанар сиргэ маһы кэрдии барыа суоҕа, мас кэрдиллэрэ көҥүллэнэр эрэ сиригэр, бары сокуону тутуһан, маһы бэлэмнээһин барыан сөбүн бэлиэтээтэ.
Ардаҕы түһэрэр сөмөлүөттэр дойдуга аҕыйахтар, ол эрээри правительство ити үлэлэргэ икки сөмөлүөт кэлэрин дуогабардаһан олорор, тыа хаһаайыстыбайытыгар искусственнай ардахтары түһэрэргэ .
Хаарбах дьиэлэртэн көһөрүү үлэлэрэ салгыы ыытыллыахтара.
Былырыынҥыга тэҥнээтэххэ, бу сылга федеральнай киинтэн 25 миллиартан тахса солк. харчыны эбии ылар буолбуппут.
Республика Ил Дархана Айсен Сергеевич дьону-сэргэни долгутар боппуруостарга --социальнай объектары тутуу, тыа хаһаайыстыбата, нэһилиэнньэни аһынан-үөлүнэн хааччыйыы, сыана үрдээһинэ, о.д.а. -- сөптөөх, судургу, дьонҥо тиийимтиэ гына быһаарбытын сөбүлээтибит. Төһө даҕаны омук судаарыстыбалара араас санкциялары биллэрбиттэрин иһин, республикабыт Ил Дархана Айсен Николаев тула саха дьоно-сэргэтэ түмсэн, үлэни-хамнаһы ыытан, оҥорон таһаарыыны элбэтэн, онон бэйэбит олохпутун тупсарарга сыал-сорук туруоруннахпытына, бары ыарахаттары, уустуктары кыайыахпыт, омук быһыытынан сайдыахпыт диэн эрэлбит улахан.
Үөһээ Бүлүү Балаҕаннаах муниципальнай тэриллиитин баһылыга, СР норуотун хаһаайыстыбатын үтүөлээх үлэһитэ Степан Дмитриев.
Балаҕаннаах нэһилиэгэ, муус устар 26 күнэ, 2022 сыл.
-
3
-
0
-
0
-
0
-
0
-
0
