Бу туһунан брифиҥҥэ Саха Өрөспүүбүлүкэтин байыаннай хамыһаара Александр Авдонин иһитиннэрдэ.
– Мобилизациянан ыҥырыыга аармыйаҕа сулууспалаабыт, байыаннай учуокка турар, байыаннай идэлээх гражданнар хабыллаллар. Биллэрии уонна хомуур Дьокуускайга ыытыллар.
Ыҥырыллыбыттар салгыы Илиҥҥи байыаннай уокурук ыстаабынан олохтоммут байыаннай чаастарга тиийэннэр, анал бэлэмнэниини барыахтара, ол эрэ кэнниттэн байыаннай сулуспалаах быһыытынан ааҕыллыахтара. Тоһоҕолоон этэбин, срочниктары анал эпэрээссийэҕэ ыыппаттар.
Наада буоллаҕына, үс сыл анараа өттүгэр сулууспалаабыттар байыаннай чааска бэлэмнэниини хаттаан ааһыахтара. Бары мобилизацияламмыттар хантараагынан сулууспалыыр байыаннайдар курдук харчынан биһирэм төлөбүрү ылаллар. Ол кээмэйэ званиеларыттан, дуоһунастарыттан тутулуктаах. Икки сүүс тыһыынча солкуобайтан элбэх буолуо. Итиэннэ байыаннайдарга көрүллэр бары чэпчэтиилэри туһаныахтара. Дьиэ кэргэннэригэр эмиэ көмөлөһөр туһунан Ил Дархан дьаһала тахсыбыта.
Мобилизацияттан түөрт уонна онтон элбэх оҕолоох гражданнар, үрдүк үөрэххэ үөрэнэр устудьуоннар, аҥаардас аҕалар, кыаммат чугас дьоннорун көрөөччүлэр, 18 саастарын туола илик бырааттарын, балтыларын эпиэкэҕэ ылбыттар, сэбилэниилээх күүстэргэ сулууспалаабатахтар, байыаннай-учуоттуур идэлэрэ, байыаннай уопута суохтар, оборуона бырамыысыланнаһын тэрилтэтигэр үлэлээччилэр, ыар буруйу оҥорбуттарын иһин сууттаммыттар, Д категориялаахтар босхолоноллор.
Мобилизация бары дьаһаллара былаан быһыытынан саҕаланна. Илиҥҥи байыаннай уокурук ыстаабын сорудахтара өрөспүүбүлүкэ муниципальнай тэрээһиннэрин баһылыктарыгар, байыаннай хамыһаардарыгар тиэрдилиннэ. «Мобилизацияны биллэрэр туһунан» бирикээс бэҕэһээ бигэргэтиллэн, нэһилиэнньэҕэ тарҕатарга анаан маассабай иһитиннэрэр сириэстибэлэргэ бэрилиннэ.
Мобилизациялыыр суругу туппут гражданнар быстах мобилизацияны биллэрэр туһунан Арассыыйа Бэрэсидьиэнин ыйааҕар, итиэннэ Саха Өрөспүүбүлүкэтин байыаннай хамыһаарын «Мобилизацияны биллэрэр туһунан» бирикээһигэр олоҕуран, этиллибит кэмҥэ военкоматтарга биитэр түмсэр пууннарга тиийиэх тустаахтар. Бэбиэскэҕэ ханна, хаһан тиийэр ыйылла сылдьар, онно пааспары, байыаннай билиэти, баан карточкатын илдьэ кэлиллэр.
Онон байыаннай учуокка турааччылар пропискалаах сирдэриттэн ыраатыа суохтаахтар, мобилизация кэмигэр атын эрэгийэҥҥэ барбаттар, бэйэлэрин территорияларыгар хаалаллар.
-
1
-
0
-
0
-
0
-
0
-
0
