Политика

Госдума Бэрэссэдээтэлэ Вячеслав Володин санаатын үллэһиннэ:

- Күн бүгүн көрөбүт дии, куттас санааларыгар дойдуларыттан күрээн, Грузияҕа, Казахстаҥҥа, онтон да атын өрөспүүбүлүкэлэргэ куотаары, элбэх килэмиэтирдээх уочараттарга турар биир дойдулаахтарбытын. Ол дьоҥҥо хайдах сыһыаннаһыахтаахпытый?.. Эһиги ону толкуйдаан көрүҥ эрэ.

 Кинилэр арҕаа дойдулары, мантра курдук, тохтоло суох хайгыыллара. Ол дойдулара кинилэртэн аккаастаннылар... Арҕааларга кинилэр олох да наадата суохтар.

Оттон биһиги, арассыыйалар, судаарыстыбабыт кыраныыссатыныын быысаһар дойдуларбыт бигэ туруктаах буолалларын туһугар төһөлөөх үлэни ыыппыппытый? Ол иһигэр Казахстаҥҥа эмиэ. Ону саарбахтыыллара, кириитикэлииллэрэ. Оттон билигин ханна куоталларый? Биһиги бигэ туруктаах олоҕу түстээбит сирдэрбитигэр -- ЕврАзЭС тэрийбит дойдуларбытыгар. Бэйэлэрин дойдуларын быраҕан туран... Ол аата Арассыыйа кинилэргэ иккис, баҕар, букатын да бэһис, алтыс миэстэҕэ сылдьыбыт эбит. Оннук таҥнарыахсыттар бардыннар, туппаппыт кинилэри, биһиэхэ оннук дьон туохха наадаларый, өскөтүн ыарахан кэмҥэ тиэрэ эргийэр буоллахтарына?  

 Онно баран, бу дьалхааннаах кэмнэри нус-бааччы туоруохпут дии саныыллар. Ол кэннэ соннук уочаракка туран, төттөрү кэлиэхтэрэ.

Кэллэхтэринэ, сыһыаммыт кинилэргэ хайдах буолуохтааҕый? Дьэ, бу боппуруос. Бу туһунан дьокутаат Петр Толстой сөпкө этэр, сыһыаммытын быһаарыахпытын наада.  Бастатан туран, буораҕы сыттаан да көрө иликтэринэ, орон анныгар күрэммит, дьууппа анныгар саспыт эдэр дьоммутугар?

Аҕыс сыл устата буомба эстиитин кутталыгар олорбут дьон бэйэлэрин инникилэрин таллылар. Куоластаабыттарга маннык халбаҥ дьон суох. Оттон манна бүддьүөт харчытыгар үөрэммиттэр, бронь ылбыттар? Эһиги, сатаатар, судаарыстыбабытын өйүүргэ бэйэлэрин санааларын этэр, өйөбүллэрин биллэрэр дьону күлүү гынымаҥ. Саҥата суох олоруҥ. Эбэтэр уйан дууһаҕытын уоскута, Казахстаҥҥытыгар, Киргизияҕытыгар бараргытын толкуйдааҥ.

Таҥнарыыны хайдах даҕаны киһи сатаан сөп диэбэт. Дойдубут уустук кэмин, иэдээнин  үллэстиэх оннугар, ханна эрэ итии сирдэргэ талаһааччылар...

Барбыттар онно хаалыахтара суоҕа. Харчылара бүтэн, төттөрү эргиллиэхтэрэ. Ол эрээри кинилэргэ таптал суох буолуоҕа...