Абакан куоракка Александр Жирков Хакасия Өрөспүүбүлүкэтин Үрдүкү Сэбиэтин бэрэссэдээтэлэ Владимир Штыгашевы кытары көрүстэ. Владимир Николаевич Штыгашев -- Арассыыйа саамай кырдьаҕас парламентарийа.
Кини Хакасия Өрөспүүбүлүкэтин Үрдүкү Сэбиэтин бэрэссэдээтэлинэн 30 сыл устата үлэлээн кэллэ. Дуоһунаһын сүнньүнэн РФ Федеральнай Мунньаҕын Федерация Сэбиэтин чилиэнинэн үлэлээбитэ. 1993 с. Москубаҕа буолбут быһылааҥҥа Владимир Штыгашев РФ Үрдүкү Сэбиэтин өйөөбүтэ. Н.Ф. Катанов аатынан Хакасия судаарыстыбаннай университетын бочуоттаах дуоктара.
Александр Жирков уонна Владимир Штыгашев өрдөөҕүттэн доҕордуулар, бэйэ-бэйэлэригэр улахан ытыктабыллаахтык сыһыаннаһаллар, ситимнэрин быспаттар, хардарыта өйөһөллөр.
В.Н. Штыгашев уонна А.Н. Жирков икки национальнай өрөспүүбүлүкэлэр парламеннара бииргэ үлэлээһиннэрин туһунан Сөбүлэһии чэрчитинэн көрүстүлэр. Маннык Сөбүлэһиини түһэрсэр туһунан этиини 2018 с. Саха Өрөспүүбүлүкэтин V ыҥырыылаах Ил Түмэнин бэрэссэдээтэлэ Александр Жирков көтөхпүтэ. Сөбүлэһии 2018 с. бигэргэммитэ уонна 2021 с. икки өрүттэр илии баттаабыттара.
В.Н. Штыгашев уонна А.Н. Жирков дойдуга буола турар быһыы-майгы туһунан санааларын атастастылар, икки өрөспүүбүлүкэ социальнай-экэнэмиичэскэй сайдыытын, Саха Сиригэр уонна Хакасияҕа олорор-сири-уоту, айылҕаны харыстааһын, олохтоох нэһилиэнньэ олоҕун-дьаһаҕын, норуот төрөөбүт тылын, култууратын харыстааһыныгар үлэ туһунан сүбэлэстилэр.
Хакасия Өрөспүүбүлүкэтин Үрдүкү Сэбиэтин бэрэссэдээтэлэ Саха Сиригэр төрөөбүт тылы уонна төрүт култуураны, омук эпическэй нэһилиэстибэтин, үгэс буолбут олоҕун эйгэтин харыстааһыҥҥа үлэ туһунан иҥэн-тоҥон ыйыталаста, 2021 сыл Хакасияҕа Эпическэй нэһилиэстибэ сылынан биллэриллибитин туһунан кэпсээтэ.
Көрсүһүүгэ Александр Жирков Владимир Штыгашевка хакас уонна саха норуотун эпическэй айымньыларын хардарыта тылбаастыыр туһунан этии киллэрдэ. Эпическэй айымньылары таһынан кинилэр хакас уонна саха остуоруйаларын, номохторун оҕолорго анаан тылбаастыыр туһунан сүбэлэстилэр. Владимир Штыгашевы кытта көрсүһүү кэнниттэн Александр Жирков Хакасия Өрөспүүбүлүкэтин тыл, литература уонна история научнай-чинчийэр институтун үлэһиттэрин кытта көрүстэ.
Институт дириэктэрэ Нина Майнагашева хакас учуонайдара М.К. Аммосов аатынан Хотугулуу-Илиҥҥи федеральнай университеты, Саха Сиринээҕи Гуманитарнай чинчийии институтун кытары научнай сибээстэрин туһунан кэпсээтэ, бу сибээһи салгыы сайыннарар туһунан эрэлин эттэ.
Истиҥ быһыыга-майгыга барбыт көрсүһүү түмүгэр хакас учуонайдара Александр Жирков аан дойду норуоттарын эпическэй нэһилиэстибэтин харыстааһыҥҥа уонна тарҕатыыга тэрийэн ыытар үгүс өрүттээх үлэтин билэллэрин уонна киниэхэ махтаналларын туһунан эттилэр. Кинилэр саха уонна хакас эпостарын хардарыта тылбаастыыр үлэни саҕалыырга үөрүүнэн сөбүлэстилэр.
-
2
-
0
-
0
-
0
-
0
-
0
