Политика

Оҕолор пааспар туттулар

«Биир ньыгыл Арассыыйа». Ил Түмэн дьокутаата, «Биир ньыгыл Арассыыйа» баартыйа чилиэнэ Алена Атласова, Норуоттар сомоҕолоһууларын күнүн көрсө, Дьокуускай куорат уокуруктааҕы дьаһалтатыгар 14 саастарын туолбут оҕолорго пааспар биэрии үөрүүлээх тэрээһинигэр сылдьыста. Парламентарий Алёна Атласова бу үөрүүлээх күҥҥэ Арассыыйа Федерациятын уонна Саха Өрөспүүбүлүкэтин төрүт сокуоннарыгар оҕолор судаарыстыбаннай бэлиитикэ бастакы күөнүгэр турарын бэлиэтээтэ. Ханнык баҕарар оҕо пааспары илиитигэр тутуута, олоҕун умнуллубат, бэлиэ түгэнэ буоларын эттэ. Өрөспүүбүлүкэҕэ дьиэ кэргэн уонна ийэ института сайдарыгар былаас, парламент уонна норуот биир сүбэнэн үлэлии сылдьарын бэлиэтээтэ.

Улуу Өктөөп өрөбөлүүссүйэтэ 105 сыла

РФКП. РФКП Саха сиринээҕи кэмитиэтин пресс-киинэ иһитиннэрбитинэн, сэтинньи 7 күнүгэр Дьокуускайга, коммунистическай баартыйа көҕүлээһининэн, эйэлээх миитин буолан ааста. Ленин аатынан проспекка өрөмүөн үлэтэ бара турарынан, быйыл буолбут хаамыы хайысхата арыый уларыйда. Ол курдук, сүрүн хаамыы мэрия дьиэтиттэн саҕалаан Орджоникидзе болуоссатыгар диэри ааста. Сүрүн миитин бу болуоссакка буолла. Улуу Өктөөп өрөбөлүүссүйэтэ буолбута 105 сылыгар аналлаах миитини баартыйа эрэгийиэннээҕи салаатын салайааччыта Виктор Губарев төлөннөөх тыл этиитинэн аста. Бу күн эҕэрдэ тыллары хомуньуус Артур Алексеев, Иннокентий Романов, Георгий Артемьев миитин кыттыылаахтарыгар анаатылар.

Маны таһынан, бу күн, КПРФ оройуоннааҕы уонна куораттааҕы кэмитиэттэрин бэйэлэрин сирдэригэр эмиэ миитиҥҥэ таҕыстылар. Гражданскай сэриигэ аналлаах мэҥэлэргэ сибэкки дьөрбөтүн уурдулар.

Омугуттан, солотуттан, итэҕэлиттэн тутулуга суох

«Новые люди». Норуоттар сомоҕолоһууларын күнүн көрсө баартыйа эрэгийиэннээҕи салаатын хамаандата Доҕордоһуу болуоссатыгар ыраастааһын үлэтин ыыттылар. Нуучча айанньытыгар Семен Дежневка уонна кини кэргэнигэр Абакайаадаҕа анаан туруоруллубут мэҥэ хаарын ыраастаатылар. Бу нуучча уонна саха норуоттарын икки ардыларыгар холбоспут бастакы ыаллар буолаллар.

- Бу олохтоммут бэлиэ күн сүрүн соруга - дойдубут хас биирдии киһитин, омугуттан солотуттан, итэҕэлиттэн тутулуга суох, бииргэ сомоҕолуохтаах, түмүөхтээх. Биһиги ханнык да үөскүүр уустуктарга, кыһалҕаларга биир санаанан салайтаран, олохтоох сүбэнэн сиэттэрдэхпитинэ барытын туоруохпут, кыайыахпыт» диэн баартыйа эрэгийиэннээҕи салайааччыта Василий Николаев иһитиннэрдэ. 

Нолуокка чэпчэтиилэр

«Сиэрдээх Арассыыйа – Патриоттар - Кырдьык туһугар». Баартыйа бэрэстэбиитэллэрэ быстах хомуурга ыҥырыллан сулууспалыы сылдьар дьон төлөнүөхтээх харчыларын нолуоктан босхолуурга ыҥыраллар. Санатар буоллахха, судаарыстыба хас биирдии сулууспаны бара сылдьар киһиэхэ 195 тыһ. солк. итэҕэһэ суох хамнаһы аныырын туһунан иһитиннэрбитэ. Бу харчыттан нолуок тутуллар буоллаҕына, сулууспатын бара сылдьар киһи хамнаһыттан 25 350 солк. көҕүрүүр.

- Быстах хомуурга ыҥырыллыбыт дьон хамнастарын нолуоктан босхолооһун дойду социальнай хайысхата бигэтик турарыгар көмө буолуоҕа, - диэн баартыйа чилиэттэрэ иһитиннэрэллэр. 

Оптуобус сырыыта уонна төлөбүрэ

 РЛДП. Дьокуускай куорат таһыгар сылдьар оптуобус сырыытын чопчулуур инниттэн, бу күннэргэ, либерал-демократ баартыйаттан «Жатай» ГУо дьокутаата Нина Щеголова уонна Мария Патрушева ЯПАК тэрилтэ бэрэстэбиитэлин көрсөн кэпсэттилэр. Сүрүн кыһалҕанан тымныыга тохтобулга дьон оптуобуһу уһуннук кэтэһэриттэн доруобуйалара эмсэҕэлиэн сөбүн, оптуобус кэмигэр кэлиитин ситиһэри, маны таһынан сырыы төлөбүрэ мобильнай баан нөҥүө оҥоһуллара сокуоннайа суоҕун аҕыннылар.