Олунньу 15 күнүгэр Ньурбатааҕы драматическай театр киэҥ-куоҥ, саҥа дьиэтигэр техника билимин хандьыдаата, профессор, 1998-2003 сыллардаахха Саха Өрөспүүбүлүкэтин тутуу уонна архитектура миниистирэ, Арассыыйа уонна Саха сирин үтүөлээх тутааччыта Юрий Николаевич Буслаев үс чаастаах кинигэтин сүрэхтэниитэ буолла.
Саха АССР төрүттэммитэ 100-сылыгар аналлаах үс чаастаах кинигэ маҥнайгы чааһа Саха автономията төрүттэнэр кэмигэр анаммыт; иккис чааһыгар 1946 сыллаахха Саха АССР миниистирдэрин Сэбиэтэ төрүттэниэҕиттэн үлэлээбит салайааччылар туһунан матырыйаал хомуллубут; кинигэ үһүс чааһа билигин үлэлии-хамсыы сылдьар Бырабыытылыстыба чилиэннэрин туһунан сырдатар. Ону таһынан, Ньурба улууһун герой-ийэлэрин уонна 50 сыл бииргэ олорбут дьиэ кэргэн туһунан элбэх хаартыскалардаах матырыйаал Ньурба улууһун олохтоохторун болҕомтотун тарта.
Ил Түмэн Бэрэссэдээтэлин солбуйааччы Антонина Григорьева бэйэтин эҕэрдэ тылыгар саха норуотун чулуу дьоно, биһиги биир дойдулаахтарбыт үгүс хайысхалаах судаарыстыбаннай, уопсастыбаннай үлэлэрин тилиннэриигэ, сөргүтүүгэ уонна сырдатыыга улахан хардыы оҥоһулунна диэн бэлиэтээн эттэ.
«Ю.Н. Буслаев бүгүн сүрэхтэнэр үс чаастаах кинигэлэригэр 1922 сыллаахтан - Саха АССР бастакы совнаркома тэриллиэҕиттэн - биһиги күннэрбитигэр диэри Ньурбаттан төрүтттэх, манна төрөөн, силис тардан, улаатан, араас сылларга Правительство чилиэннэринэн, миниистирдэринэн үлэлээбит барыта 24 киһи дьылҕата, Саха сирэ сайдарын туһугар киллэрбит кылааттара олус чаҕылхайдык арыллыбыта бу биһиэхэ, кэлэр кэнэҕэски ыччакка туохха да тэҥнэммэт бэлэх.
Өрөспүүбүлүкэ аҕа баһылыга 2022 сылы - республикабыт үбүлүөйдээх сылын, ийэ буолуу социальнай статуһун үрдэтэр сыалтан Саха сиригэр Ийэ сылынан биллэрбитэ. Онно сөп түбэһиннэрэн Ю.Н. Буслаев маҥнайгы кинигэҕэ биһиги улууспут киэн туттуута буолар «Герой-ийэ» чиэстээх аатын сүкпүт 36 ийэтин олохторун-дьаһахтарын, оҕолорун уонна 50 сыл бииргэ олорбут 24 дьиэ кэргэн туһунан хаартыскалар киирбиттэрэ Саха сирин ийэлэрин дьолуттан бүтүн уопсастыба дьоло тутулуктанарын, биһиги инники уонна кэлэр кэскилбитигэр саамай үрдүк сыаннастарбыт уонна тирэхпит буоларын өссө биирдэ туоһулуур.
Түмүкпэр этиэм этэ бу кинигэлэр элбэх ааҕааччы интэриэһин тардан, үйэлээх, көлүөнэттэн көлүөнэҕэ бэриллэн дойдубут историятын сырдата сырыттыннар. Юрий Николаевич, эһиэхэ айымньылаах, уопсастыбаннай үлэҕитигэр саҥаттан саҥа чыпчааллары, алаһа дьиэҕитигэр этэҥҥэ буолууну баҕарабын! Улууспут бары олохтоохторугар, ытык-мааны ветераннарыгар, үтүө үлэһит дьонугар, инникигэ эрэллээх эдэр ыччатыгар кытаанах доруобуйаны, туруоруллубут сыалы–соругу толорууга ситиһиилэри, Ньурбабыт сайдарын туһугар айымньылаах үлэни баҕарабын.
Тапталлаах Ньурбабыт сириттэн инникитин даҕаны саха норуота киэн туттар үлэһит дьоно, салайааччылара уонна айар талааннар тахса туруохтара диэн эрэнэбин!» - диэн эттэ.
-
0
-
0
-
0
-
0
-
0
-
0
