Киһи орто дойду олохтооҕо, халлааннааҕы ыраас аанньал буолбатах, онон итэҕэстээхпит- быһаҕастаахпыт олох сокуона. Ол эрээри, хас биирдии киһи бу олоххо мээнэ кэлбэт, бэйэтин кэнниттэн туох эрэ суолу-ииһи хааллараары, кэлэр кэнчээри ыччакка үтүө холобур буолан кэрэ кэпсээн буолан хаалаары кэлэр. Хас кинигэ сүрэхтэниитигэр тура-тура ааптары арбааһын буолар, онтон мин кинигэм уратыта бу дьоннор баар буоланнар, кинилэр холобур буолар олохторун сырдатыы, кинилэргэ махтаныы буолар. Мин кыларыйар кырдьыгы суруйабын, тугу да тупсаран-киэргэтэн айбаппын, киһи тыыннааҕар хайҕаныахтаах, үтүө тыллары истиэхтээх диибин. Тыа сирин үтүөкэн үлэһит дьоннорун тустарынан икки кинигэни таһаардым.
Киһиэхэ кыра да наада. Суруллубут – суоруллубат. Кинигэм биир дьоруойа эппитинии, билигин төһө да араас технология күүскэ сайыннар, уу ылбатаҕына, уот сиэбэтэҕинэ, кинигэ эрэ кэлэр кэнчээригэ кэрэ кэпсээн буолан хаалыаҕа. Биһирэмҥэ ааптар быһыытынан үгүс кэрэ тыллары иһиттим: дьон үтүөтүн өрө тутаҕын, сырдыгы сырсан сандаараҕын, дьон олоҕун сыаналыырга үөрэтэҕин, тулалыыр эйгэҕэ тапталгын, олоххо көрүүлэргин дьоҥҥор-сэргэҕэр бэлэх ууннуҥ, эн таһаарбыт кинигэлэргин ааҕан сайдыыга, сырдыкка, талаһыахтара, дойдуга тапталлара үрдүү туруо, дьон кэрэтин, үчүгэйин бэйэтэ кэрэ, үтүө санаалаах киһи таба тутар, истэр, өйдүүр дьоҕурдаах диэбиттэрэ ама кими кынаттаабат, үөрдүбэт буолуой?! Махтал, бар дьонум. Күндү ыалдьыттарым талба талааннара кэлбит дьону олус сэргэхситтэ. Олоҕум дьоллоох суолугар көрсүбүт дьүөгэлэрим Зоя, Ира, Роза ыллаан-туойан, улуус уона өрөспүүбүлүкэ киэн туттуулара Мария, Василий Спиридоновтар ылбаҕай ырыаларынан, Мария Ефимова көрө-нара кэрэ күммүн киэргэппиттэригэр туспа Махтал!
Зинаида Федотова-Дьол Кыыма, Сунтаар.
-
0
-
0
-
0
-
0
-
0
-
0
