СӨ спордун миниистирэ Леонид Спиридонов, улуус баһылыга Алексей Иннокентьев 2027 с. Ньурбаҕа буолар бу улахан күрэхтэһиигэ бэлэмнэнии туһунан иһитиннэрии оҥордулар. Өрөспүүбүлүкэ бары улуустарыттан 5 тыһ. кэриҥэ спортсмен кэлиэҕэ, 15 көрүҥҥэ күрэхтэһиилэр буолуохтара. Күрэхтэһиилэри көрсө элбэх эбийиэк: Ньурба 3 тыһ. миэстэлээх стадион, бассыайыннаах Физкултуурунай-чэбдигирдэр комплекс, Антоновкаҕа спортивнай күөн көрсүүлэрин спорт саалата, Күндээдэҕэ (номнуо тутулла турар), Сүлэҕэ, Чаппандаҕа спорт саалата уо.д.а. тутуллара былааннанар.
Сүбэ мунньахха биирдиилээн эбийиэктэринэн илдьиритэн сиһилии дьүүллэстилэр. Онлайн көрүҥүнэн өрөспүүбүлүкэ министиэристибэлэрин салайааччылара кытыннылар. 2023 с. өрөспүүбүлүкэ бүддьүөтүгэр Ньурба к. 3 тыһ. миэстэлээх стадион тутуутун саҕалыырга, 2024 с. бүтэрэр курдук үбү көрөргө быһаарылынна.
Бассыайыннаах Физкултуурунай-чэбдигирдэр комплекс тутуутун федеральнай бырагыраамаҕа 2024-2026 сс. киллэртэрии былааннанар, СӨ Спордун министиэристибэтэ РФ Спордун министиэристибэтин кытта эбии сөбүлэһии түһэрсэн үлэлииригэр сорудахтанна.
Атын даҕаны эбийиэктэргэ эмиэ чопчу быһаарыылар ылылыннылар. Бу аҥардас спорт эрэ эбийиэктэринэн муҥурдаммат, үөрэх, култуура, суол хаһаайыстыбатын эбийиэктэрэ эмиэ бааллар. Ол иһигэр Ньурба 3 №-дээх уонна Убайаан оскуолатын, Антоновкаҕа 280 миэстэлээх самалык начаалынай оскуола дьиэтэ уонна 150 миэстэлээх оҕо уһуйаана, Маарга норуот айымньытын дьиэтэ уо.д.а. Ньурба к. күүтүүлээх балыыһа 2-с уочаратын бырайыактааһыҥҥа уонна тутууга куонкурус сэтинньи 25 к. биллэриллэн турар.
Алексей Иннокентьев Куоначчаан муостатын туттарар инниттэн муниципальнай суолу өрөспүүбүлүкэ бас билиитигэр биэрэргэ туруоруста. Сергей Местников СӨ Тырааныспар уонна суол хаһаайыстыбатын министиэристибэтэ Ньурба улууһун салалтатын ыҥыран дьүүллэһэн сөптөөх быһаарыыны булан СӨ Бырабыыталыстыбатыгар сөбүлэһиннэриигэ киллэрэригэр сорудахтаата. Сергей Васильевич түмүк тылыгар федеральнай үбүлээһиҥҥэ кыттыахтаах эбийиэктэр кэрискэлэрэ чуолкайдаммытын, Ньурбаҕа СӨ норуоттарын IX Спортивнай оонньууларыгар диэри 4 сылтан ордук кэм баарын, онон үчүгэйдик бэлэмнэнэр кыах баарын, федеральнай бырагыраамаларга барытыгар сайаапкалаһан киириллиэхтээҕин, эбийиэктэр суумаларын аҥарын кэриҥэ федеральнай үптэн тардыллыахтааҕын бэлиэтээтэ. Күрэхтэһиини бу иннинээҕи Оонньуулартан уратылаах уонна креативнай буоларын курдук, Дальнай Восток сүүмэрдэммит хамаандатын ыҥыран зачету таһынан кытыннарыыны холобурдаан этии киллэрдэ.
-
0
-
0
-
0
-
0
-
1
-
0
