«Бу түһүлгэҕэ миэстэлэһэр уолаттар улахан дьоҥҥо ситиһиилээхтик тустуохтара диэн эрэл үөскүүр. Тренерскэй штаб сөптөөх үлэтин түмүгэ», — диэн сыаналаата.

61 киилэҕэ кыһыл көмүс мэтээли ылбыт Виктор Яковлев тус тренерэ Николай Рожин иитиллээччитин кытта бэһис сылын үлэлиирин кэпсээтэ: «Витя ис кыаҕа улахан, инникитин үчүгэй ситиһиилэргэ эрэнэбин», — диэтэ үтүөлээх тренер.

Виктор Яковлев Грознай көбүөрүгэр туста тахсарыгар, бастакы күн саха уолаттара бары хотторбуттарынан, киниэхэ улахан эппиэтинэс үөскээбитин өйдөөн, хайаан даҕаны олох кыайарга эрэ диэн өйүн-санаатын күүскэ хомуммутун эттэ. Сахатын Сирин аатын хайаан даҕаны көмүскүүр бигэ дьулуурдаах тустубута үтүө түмүгү биэрдэ.

Маны сэргэ спортсмен икки ыйынан 23 сааһын туоларын, тустуунан оскуолаҕа киирээт дьарыктанан саҕалаабытын, кумира Давид Баев буоларын кэпсээтэ. Бастакы тренерэ – Николай Николаевич Филиппов.

«Улахан дьоҥҥо Арассыыйа чемпионатыгар 65 киилэҕэ тустуом. Билиҥҥи сүрүн соругум – аан дойдуга тустуу», — диэн билиһиннэрдэ Виктор.

Өрөспүүбүлүкэ бас-көс тренерэ Вадим Семенов маннык иһитиннэрдэ:

— Ыччаттарга аан дойду түһүлгэтэ алтынньыга Лас-Вегаска (АХШ) буолуохтаах. Грознайга бастаабыттар кыттыахтаахтар былаан быһыытынан. Онно виза ылыыта сытыы боппуруос. Улахан дьону этэр буоллахха, дойду чемпионатыгар бэлэмнэниини бу ый бүтүүтэ саҕалыахпыт. Билигин күрэхтэһиилэр кэмнэрэ бара турар, аҕыйах хонугунан Каспийскайга Али Алиев аатынан турнир буолуохтаах. Чемпионакка бэлэмнэнии үс түһүмэҕинэн барыаҕа, ол иһигэр «Байкал» турнирга кыттыахпыт. Лев Павлов быһа Красноярскайга В.Модосяҥҥа салгыы эрчиллэ барда. Кини олохтоох уолу кытта хапсыһыытыгар, биһиги көрүүбүтүгэр, атын даҕаны специалистар сыаналыылларынан, икки очкотун чахчы биэрбэтилэр.

Ыччаттар хамаандаларын сүрүн тренерэ Прокопий Петров:

— 23 бөҕөс кытынна, үс мэтээлгэ былааннаах этибит, ол сорукпутун толордубут. Лев Павлов эбиллибит, тустуута тупсан иһэр диэн сыаналаатыбыт. Атыттартан Игорь Матвеев, Владимир Бояновскай эмиэ үчүгэй тустууну көрдөрдүлэр.

Гаврил Мохначевскай Виктор Яковлевы өссө төгүл эҕэрдэлээн туран, спортсмеҥҥа министиэристибэ грамотатын, оттон тренер Николай Рожиҥҥа махтал суругу туттарда, инникитин өссө үрдүк ситиһиилэри баҕарда диэн Дьулурҕан саайтыгар суруйар.

Гаврил СТРУЧКОВ

Ааптар түһэриитэ.